ایران: کلیئرنس آپریشن کے دوران دھماکے سے پاسدارانِ انقلاب کے 14 اہلکار جاں بحق

تہران میں ایرانی پاسداران انقلاب کے 14 اہلکار بارودی مواد کو ناکارہ بنانے کے دوران ہونے والے دھماکے میں ہلاک اور دو زخمی ہو گئے۔ یہ واقعہ صوبہ زنجان میں پیش آیا جہاں اہلکار ممنوعہ اور غیر پھٹنے والے گولہ بارود کو تلف کرنے کی کارروائی میں مصروف تھے۔

میڈیا رپورٹس کے مطابق دھماکے کا سبب بننے والا مواد مبینہ طور پر امریکہ اور اسرائیل کا تیار کردہ تھا۔ حکام کا کہنا ہے کہ صوبہ زنجان میں 1200 ہیکٹر سے زائد رقبہ اب بھی خطرناک دھماکہ خیز مواد سے آلودہ ہے، جس میں سے کچھ ہتھیار زمین میں تین میٹر گہرائی تک دبے ہوئے ہیں۔ حکام نے اس صفائی آپریشن کو انتہائی پرخطر قرار دیا ہے۔

دوسری جانب وال اسٹریٹ جرنل کی رپورٹ کے مطابق ایران نے امریکہ کے ساتھ ممکنہ امن مذاکرات کے لیے اپنی شرائط میں نرمی پیدا کر دی ہے۔ رپورٹ میں دعویٰ کیا گیا ہے کہ تہران نے اپنی نظر ثانی شدہ تجاویز میں فوری طور پر ناکہ بندی ختم کرنے کا مطالبہ ترک کرنے پر آمادگی ظاہر کی ہے۔

رپورٹ کے مطابق ایران نے پاکستان کے توسط سے امریکہ کو 14 نکاتی تجاویز ارسال کی ہیں، جن میں یہ بھی شامل ہے کہ مذاکرات کا پہلا مرحلہ اگر کامیاب رہا تو آئندہ ہفتے پاکستان میں بات چیت کا انعقاد ممکن ہو سکتا ہے۔ تاہم اس کا انحصار امریکی منظوری پر ہے۔

تجاویز کے مطابق مذاکرات کے ابتدائی مرحلے میں ایران کے جوہری اور میزائل پروگرام کو شامل نہیں کیا جائے گا، البتہ امریکی پابندیوں میں نرمی کے بدلے بعد میں ان معاملات پر بات چیت کی جا سکتی ہے۔ رپورٹ میں مزید کہا گیا ہے کہ آبنائے ہرمز کو دوبارہ کھولنے کے معاملات کا انحصار ناکہ بندی کے خاتمے میں ہونے والی پیش رفت سے مشروط کیا گیا ہے۔