مراکش: ساتھی کو بچانے کی کوشش میں لاپتہ ہونے والے امریکی فوجی کی تلاش جاری

مراکش کے ساحل پر لاپتہ ہونے والے دو امریکی فوجی اہلکاروں کی تلاش کے لیے ریسکیو آپریشن تیسرے روز بھی جاری ہے۔ امریکی محکمہ دفاع کے حکام کے مطابق یہ واقعہ ہفتے کے روز پیش آیا جب امریکی فوج کے دو اہلکار بحر اوقیانوس کے پانیوں میں لاپتہ ہو گئے۔

ابتدائی رپورٹ کے مطابق فوجی اہلکاروں کا ایک گروپ غروب آفتاب کا نظارہ کرنے کے لیے ساحلی چٹانوں کے قریب موجود تھا کہ اس دوران ایک اہلکار پانی میں گر گیا۔ ساتھیوں نے اپنی بیلٹس کو جوڑ کر انسانی زنجیر بنانے کی کوشش کی تاکہ اسے بچایا جا سکے، تاہم وہ ناکام رہے۔

حکام نے بتایا کہ جب پہلا اہلکار پانی میں گرا تو اسے بچانے کے لیے دوسرا اہلکار بھی سمندر میں کود پڑا، جسے معلوم تھا کہ پہلا شخص تیراکی نہیں جانتا۔ اسی دوران ایک زوردار لہر نے دوسرے اہلکار کو اپنی لپیٹ میں لے لیا۔ دونوں کو واپس کنارے پر آنے میں دشواری کا سامنا تھا، جس پر تیسرا اہلکار انہیں بچانے کے لیے پانی میں اترا۔ تیسرا اہلکار دونوں کو تو نہ بچا سکا لیکن خود بحفاظت کنارے پر پہنچنے میں کامیاب ہو گیا۔

یہ فوجی اہلکار افریقن لائن نامی سالانہ مشترکہ فوجی مشقوں کا حصہ تھے، تاہم حکام کا کہنا ہے کہ اس واقعے کا عسکری مشقوں سے کوئی تعلق نہیں ہے۔ یہ مشقیں امریکی محکمہ دفاع کی زیر نگرانی ہوتی ہیں جن میں 30 سے زائد ممالک کے 7 ہزار سے زائد اہلکار شریک ہیں۔

مراکش کے جنوبی ساحل پر لاپتہ ہونے والے اہلکاروں کی تلاش کے لیے فضائی جہازوں، ڈرونز، غوطہ خوروں اور بحری جہازوں کی مدد لی جا رہی ہے۔ امریکی حکام کے مطابق تلاش کا عمل تاحال جاری ہے لیکن اب تک ان کا سراغ نہیں مل سکا۔