فرانسیسی اسٹارٹ اپ کی جانب سے روبوٹس کے لیے جدید اے آئی ماڈل اور انسانی ہاتھ کی نقاب کشائی

فرانسیسی روبوٹکس اسٹارٹ اپ جینیسس اے آئی نے مصنوعی ذہانت پر مبنی ایک نیا ماڈل اور انسانی ہاتھ سے مماثلت رکھنے والا روبوٹک ہاتھ متعارف کروا دیا ہے۔ اس کمپنی کو سابق گوگل سی ای او ایرک شمٹ اور ٹیلی کام ٹائیکون زیویئر نیل کی سرپرستی حاصل ہے۔

مسٹرل کے سابق محقق تھیوفائل گیرویٹ کی جانب سے قائم کردہ اس کمپنی نے جین-26.5 ماڈل پیش کیا ہے، جو دیگر کمپنیوں کے تیار کردہ روبوٹس کو بھی چلانے کی صلاحیت رکھتا ہے۔ کمپنی اس وقت فرانس، جرمنی اور اٹلی میں ممکنہ صارفین کے ساتھ جدید مذاکرات کر رہی ہے۔

یہ پیشرفت ایسے وقت میں سامنے آئی ہے جب یورپ اپنی صنعتوں کو دوبارہ فعال کرنے اور ایشیائی مینوفیکچرنگ پر انحصار کم کرنے کے لیے کوشاں ہے۔ جرمنی کی کمپنی شیفلر نے بھی حال ہی میں توقع ظاہر کی ہے کہ 2030 تک ان کے روبوٹکس آرڈرز کی مالیت کروڑوں یورو تک پہنچ جائے گی۔

سال 2025 کے اوائل میں قائم ہونے والی جینیسس اے آئی نے ابتدائی فنڈنگ کے دوران 10 کروڑ 50 لاکھ ڈالر حاصل کیے ہیں، جو فرانس کی تاریخ کی بڑی سرمایہ کاری میں سے ایک ہے۔ اس میں سرکاری سرمایہ کاری بینک بی پی فرانس بھی شامل ہے۔

کمپنی کے شریک بانی تھیوفائل گیرویٹ نے بتایا کہ وہ یورپ کو ترجیح دے رہے ہیں جس کی بڑی وجہ یہاں موجود باصلاحیت افراد اور صنعتی مارکیٹ کی وسعت ہے۔ کمپنی کا ہدف آٹوموٹو، الیکٹرانکس، فارماسیوٹیکل اور لاجسٹکس جیسے شعبے ہیں، جہاں روایتی روبوٹس کو نازک کاموں میں دشواری کا سامنا ہوتا ہے۔

کمپنی کی کمرشل اور اسٹریٹجی نائب صدر ویوین سن کے مطابق صارفین کے ساتھ معاہدے تین سے پانچ سال کے دورانیے پر مشتمل ہوں گے۔ جینیسس اے آئی روبوٹکس ڈیٹا سیٹس کی تیاری کے لیے صنعتی ورکرز کے ساتھ مل کر کام کر رہی ہے، جس میں سینسر والے دستانوں کی مدد سے ڈیٹا اکٹھا کیا جا رہا ہے۔

متعارف کرایا گیا روبوٹک ہاتھ انسانی جسمانی ساخت کے قریب تر ہے، جس سے انسانی حرکات کو مشینوں تک منتقل کرنا آسان ہو گیا ہے۔ ایک ویڈیو میں اس روبوٹ کو ٹماٹر کاٹتے، انڈے توڑتے، روبک کیوب حل کرتے اور پیانو بجاتے ہوئے دیکھا جا سکتا ہے۔

یہ پیشرفت جینیسس اے آئی کو چین کی کمپنی لنکر بوٹ کے مقابلے میں کھڑا کرتی ہے، جو روبوٹک ہینڈز کی بڑھتی ہوئی مانگ کے پیش نظر 6 ارب ڈالر کی ویلیویشن حاصل کرنے کے لیے کوشاں ہے۔ جینیسس اے آئی نے مزید سرمایہ کاری کے حصول کی توقع ظاہر کی ہے تاہم فی الحال پبلک لسٹنگ کے امکان کو قبل از وقت قرار دیا ہے۔