مشرقِ وسطیٰ میں جنگ بندی: امریکا کو ایران کے حتمی جواب کا انتظار

امریکا مشرق وسطیٰ میں جاری جنگ کے خاتمے اور خلیج سے اہم تجارتی گزرگاہ کو دوبارہ کھولنے کے لیے ایران کے حتمی جواب کا منتظر ہے۔ امریکی صدر ڈونلڈ ٹرمپ کی جانب سے مذاکرات میں پیش رفت کے اشاروں اور ایران کے اس بیان کے بعد کہ وہ اپنا مؤقف ثالث پاکستان تک پہنچائے گا، ایشیائی اسٹاک مارکیٹوں میں تیزی جبکہ عالمی منڈی میں تیل کی قیمتوں میں کمی دیکھی گئی ہے۔

امریکا اور ایران کے درمیان جنگ بندی کی کسی بھی ممکنہ توسیع سے لبنان میں کشیدگی کم ہونے کی امید پیدا ہوئی ہے، جہاں اسرائیل کے ساتھ نازک جنگ بندی ایک بار پھر خطرے میں پڑ گئی ہے۔ بیروت کے جنوبی مضافات میں اسرائیلی حملے میں حزب اللہ کے ایک کمانڈر کی ہلاکت کے بعد صورتحال کشیدہ ہے۔

فروری کے اواخر میں شروع ہونے والی اس جنگ کے بعد سے ایران نے مشرق وسطیٰ بھر میں جوابی کارروائیاں کرتے ہوئے آبنائے ہرمز کو بند کر رکھا ہے، جو عالمی تیل اور گیس کی صنعت کے لیے ایک کلیدی تجارتی راستہ ہے۔ صدر ٹرمپ نے رواں ہفتے آبنائے ہرمز کو کھولنے کے لیے بحری آپریشن کا اعلان کیا تھا لیکن مذاکرات میں پیش رفت کے پیش نظر اسے چند گھنٹوں میں ہی واپس لے لیا گیا۔

امریکی نشریاتی ادارے این بی سی نیوز کے مطابق ٹرمپ کا یہ فیصلہ سعودی ولی عہد محمد بن سلمان کی جانب سے امریکی افواج کو سعودی فضائی حدود اور فوجی اڈوں کے استعمال کی اجازت نہ دینے کے بعد سامنے آیا۔ دوسری جانب ایکسیوس کی رپورٹ کے مطابق واشنگٹن اور تہران جنگ کے خاتمے اور ایران کے جوہری پروگرام پر مذاکرات کے لیے ایک مفاہمتی یادداشت پر متفق ہونے کے قریب ہیں۔

ایران کے دفتر خارجہ کے ترجمان اسماعیل بقائی نے تصدیق کی ہے کہ امریکی تجویز کا جائزہ لیا جا رہا ہے اور حتمی فیصلے سے ثالث پاکستان کو آگاہ کر دیا جائے گا۔ ادھر ایرانی صدر مسعود پزشکیان نے سپریم لیڈر مجتبیٰ خامنہ ای سے ملاقات کی تصدیق کی ہے، جو مارچ کے اوائل میں تقرری کے بعد پہلی بار منظر عام پر آئے ہیں۔

تیل کی عالمی قیمتوں میں مزید دو فیصد کمی ریکارڈ کی گئی ہے جس کے بعد برینٹ اور ویسٹ ٹیکساس انٹرمیڈیٹ کی قیمتیں سو ڈالر کی علامتی سطح سے نیچے آ گئی ہیں۔ تاہم خطے میں جاری کشیدگی اور معاشی بدحالی کے باعث عام ایرانی شہریوں میں شدید تشویش پائی جاتی ہے۔

لبنان کے محاذ پر اسرائیلی وزیراعظم بنجمن نیتن یاہو نے دھمکی دی ہے کہ اسرائیل کے خلاف کارروائی کرنے والا کوئی بھی شخص محفوظ نہیں رہے گا۔ اسرائیلی فوج نے بھی تصدیق کی ہے کہ جنوبی لبنان میں ڈرون حملے کے نتیجے میں ان کے چار فوجی زخمی ہوئے ہیں۔