جنوبی لبنان میں اسرائیلی فضائی حملہ، 7 افراد جاں بحق

جنوبی لبنان کے علاقے ساکسکیہ میں اسرائیلی فضائی حملے کے نتیجے میں ایک بچے سمیت کم از کم سات افراد ہلاک اور پندرہ زخمی ہو گئے۔ لبنانی وزارت صحت کے مطابق یہ کارروائی ہفتے کے روز کی گئی۔

اسرائیلی فوج نے دعوی کیا ہے کہ اس نے ساکسکیہ میں حزب اللہ کے ٹھکانوں کو نشانہ بنایا اور ان پر اسرائیلی فوجیوں کے خلاف حملوں کی منصوبہ بندی کا الزام عائد کیا۔ اسرائیلی فوج کے ترجمان نے اپنے بیان میں کہا کہ انہیں اس عمارت میں عام شہریوں کے متاثر ہونے کی اطلاعات موصول ہوئی ہیں جہاں دہشت گردوں کو نشانہ بنایا گیا تھا، اور واقعے کی تفصیلات کا جائزہ لیا جا رہا ہے۔

سولہ اپریل کو امریکی ثالثی میں ہونے والی جنگ بندی کے اعلان کے باوجود اسرائیل اور حزب اللہ کے درمیان جنوبی لبنان میں جھڑپوں کا سلسلہ جاری ہے۔ اس علاقے میں اسرائیل نے خود ساختہ سیکیورٹی زون قائم کر رکھا ہے۔

اسرائیل نے بدھ کے روز بیروت کے جنوبی مضافات میں بھی فضائی کارروائی کی، جس میں حزب اللہ کی ایلیٹ رضوان فورس کے کمانڈر کی ہلاکت کا دعوی کیا گیا۔ جنگ بندی کے اعلان کے بعد بیروت پر یہ پہلا اسرائیلی حملہ تھا۔

ایک جانب اسرائیل اور حزب اللہ کے درمیان جنگ شدت اختیار کر چکی ہے تو دوسری جانب امریکہ نے واشنگٹن میں لبنان اور اسرائیل کے سفیروں کے درمیان مذاکرات کے دو دور منعقد کیے ہیں۔ یہ گزشتہ کئی دہائیوں کے دوران دونوں ممالک کے سرکاری نمائندوں کے درمیان اعلیٰ ترین سطح کے رابطے ہیں۔