امریکا کے مطالبات غیر معقول ہیں، ایرانی وزارت خارجہ کا بیان

ایرانی وزارت خارجہ کے ترجمان اسماعیل بقائی نے خبردار کیا ہے کہ امریکا کے غیر معقول مطالبات کسی صورت قبول نہیں کیے جائیں گے اور اگر ایران پر جنگ مسلط کرنے کی کوشش کی گئی تو تہران بھرپور طاقت کے ساتھ جواب دے گا۔ پیر کے روز پریس بریفنگ سے خطاب کرتے ہوئے انہوں نے کہا کہ سفارت کاری کے اپنے اصول ہوتے ہیں تاہم ایران اپنے قومی مفادات اور عوام کے تحفظ کو اولین ترجیح دیتا ہے۔

ترجمان نے انکشاف کیا کہ ایران نے امریکی صدر ڈونلڈ ٹرمپ کی جانب سے موصول ہونے والی تجویز کا جواب ایک روز قبل پاکستان کے توسط سے بھجوا دیا ہے۔ اسماعیل بقائی کے مطابق ایران کا جواب متوازن ہے اور تہران نے علاقائی مفادات کو مدنظر رکھتے ہوئے واشنگٹن کی تجاویز پر ردعمل دیا ہے۔ انہوں نے اس بات کا اعتراف کیا کہ پاکستان ایک پیشہ ورانہ ثالث کا کردار ادا کر رہا ہے۔

ایران نے چین کو بھی آگاہ کیا ہے کہ امریکی اقدامات خطے میں عدم استحکام پیدا کر رہے ہیں جو علاقائی سلامتی کے لیے تشویش کا باعث ہیں۔ تہران نے امریکا کے سامنے جنگ کے خاتمے، پابندیاں ہٹانے اور سمندری راستوں کی بحالی کے لیے ایک منصفانہ تجویز رکھی ہے، جس میں ایرانی منجمد اثاثوں کی غیر قانونی بندش کا خاتمہ بھی شامل ہے۔

اسماعیل بقائی نے یورپی ممالک پر زور دیا کہ وہ آبنائے ہرمز کے معاملات میں مداخلت سے گریز کریں اور امریکا و اسرائیل کے دباؤ میں نہ آئیں۔ انہوں نے متنبہ کیا کہ آبنائے ہرمز یا خلیج فارس میں کسی بھی قسم کی مداخلت عالمی توانائی کی قیمتوں میں مزید اضافے کا سبب بن سکتی ہے۔

دوسری جانب امریکی صدر ڈونلڈ ٹرمپ نے سوشل میڈیا پر اپنے بیان میں ایران کے جواب کو مسترد کرتے ہوئے اسے ناقابل قبول قرار دیا ہے۔ اس پیش رفت نے دس ہفتوں سے جاری تنازع کے فوری خاتمے کی امیدوں کو دھندلا دیا ہے، جس کے باعث ایران اور لبنان میں بڑے پیمانے پر تباہی ہوئی ہے اور عالمی توانائی کی فراہمی کا نظام بھی متاثر ہوا ہے۔