نیپال: کٹھمنڈو ایئرپورٹ پر لینڈنگ کے دوران ترک ایئرلائنز کے طیارے میں آگ، تمام مسافر محفوظ

نیپال کے دارالحکومت کھٹمنڈو کے تریبھون انٹرنیشنل ایئرپورٹ پر استنبول سے آنے والی ترک ایئرلائنز کی پرواز لینڈنگ کے دوران حادثے کا شکار ہو گئی۔ طیارے کے دائیں لینڈنگ گیئر میں آگ لگنے اور دھواں اٹھنے کے بعد ہنگامی صورتحال پیدا ہو گئی۔

ایئرپورٹ حکام کے مطابق ایئربس 330 طیارے میں 277 مسافر سوار تھے جنہیں بحفاظت نکال لیا گیا ہے۔ خوش قسمتی سے اس واقعے میں کسی جانی نقصان کی اطلاع نہیں ملی ہے۔

واقعے کے فوری بعد ایمرجنسی عملے نے موقع پر پہنچ کر آگ پر قابو پا لیا۔ تاہم حفاظتی اقدامات کے پیش نظر ایئرپورٹ کو پیر کی صبح سے بند کر دیا گیا ہے۔

ایئرپورٹ پر واحد رن وے دستیاب ہونے کے باعث انتظامیہ کی جانب سے اسے کلیئر کرنے کی کوششیں جاری ہیں جس کے باعث کھٹمنڈو آنے والی متعدد پروازوں کو فضا میں ہی روک دیا گیا ہے۔

نیپال میں پہاڑی جغرافیہ اور بدلتے موسم کے باعث فضائی سفر کو مشکل سمجھا جاتا ہے اور یہاں طیاروں کے حادثات کا تناسب نسبتاً زیادہ ہے۔

یاد رہے کہ اس سے قبل 2015 میں بھی ترک ایئرلائنز کا ایک طیارہ شدید دھند کے دوران کھٹمنڈو ایئرپورٹ پر پھسل کر رن وے سے باہر چلا گیا تھا جس کے باعث ایئرپورٹ کئی روز تک بند رہا تھا۔ اس واقعے میں بھی کوئی جانی نقصان نہیں ہوا تھا اور بعد ازاں اس طیارے کو میوزیم میں منتقل کر دیا گیا تھا۔