ایران پر حملہ ہوا تو 90 فیصد تک یورینیم افزودہ کر سکتے ہیں، ایرانی رکن پارلیمنٹ کی دھمکی

ایرانی پارلیمنٹ کے ترجمان ابراہیم رضائی نے منگل کے روز خبردار کیا ہے کہ اگر ایران پر دوبارہ حملہ کیا گیا تو تہران یورینیم کی افزودگی کی شرح نوے فیصد تک لے جا سکتا ہے، جو کہ جوہری ہتھیار بنانے کے لیے درکار معیار ہے۔

قومی سلامتی اور خارجہ پالیسی کمیشن کے ترجمان ابراہیم رضائی نے سماجی رابطے کی ویب سائٹ ایکس پر اپنے بیان میں کہا کہ ایران کے پاس موجود آپشنز میں سے ایک نوے فیصد تک افزودگی بھی ہے اور پارلیمنٹ اس معاملے پر نظرثانی کرے گی۔

امریکی صدر ڈونلڈ ٹرمپ نے پیر کے روز کہا تھا کہ ایران کی جانب سے پیش کردہ تجاویز کو مسترد کرنے کے بعد امریکہ اور ایران کے درمیان جاری جنگ بندی کا عمل انتہائی نازک صورتحال سے دوچار ہے۔

گزشتہ جون میں صدر ٹرمپ نے دعویٰ کیا تھا کہ بارہ روزہ جنگ کے دوران امریکی اور اسرائیلی حملوں میں ایران کی جوہری تنصیبات کو تباہ کر دیا گیا تھا جس سے یورینیم افزودہ کرنے کی صلاحیت محدود ہو گئی تھی۔ تاہم تہران کے پاس موجود ساٹھ فیصد تک افزودہ چار سو کلوگرام یورینیم کی حتمی صورتحال اب بھی غیر واضح ہے۔

امریکی انٹیلی جنس کے جائزوں کے مطابق تہران کا جوہری پروگرام اس وقت تک بری طرح متاثر نہیں ہوگا جب تک کہ ہائیلی اینرچڈ یورینیم کا یہ ذخیرہ ختم یا ملک سے باہر منتقل نہیں کیا جاتا۔

فروری کے آخر میں شروع ہونے والے تنازع کے خاتمے کے لیے امریکہ اور ایران کے درمیان جاری مذاکرات میں جوہری پروگرام کا معاملہ سب سے بڑی رکاوٹ بنا ہوا ہے۔ واشنگٹن کا مطالبہ ہے کہ ایران اپنا افزودہ شدہ ذخیرہ بیرون ملک منتقل کرے اور مقامی سطح پر افزودگی ترک کر دے، جبکہ تہران کا موقف ہے کہ جوہری موضوعات پر بات چیت بعد کے مراحل میں کی جانی چاہیے۔