بنگلہ دیش کے خلاف ٹیسٹ سیریز: قومی اسکواڈ میں چار نئے کھلاڑی شامل

پاکستان کرکٹ بورڈ نے بنگلہ دیش کے خلاف آئندہ دو ٹیسٹ میچوں کی سیریز کے لیے قومی اسکواڈ کا اعلان کر دیا ہے۔ سولہ رکنی ٹیم کی قیادت شان مسعود کریں گے۔ سلیکشن کمیٹی نے اسکواڈ میں چار نئے کھلاڑیوں عبداللہ فضل، عماد بٹ، اذان اویس اور محمد غازی غوری کو شامل کیا ہے۔

آئی سی سی ورلڈ ٹیسٹ چیمپئن شپ کا حصہ یہ سیریز اگلے ماہ کھیلی جائے گی۔ پہلا ٹیسٹ 8 سے 12 مئی تک شیر بنگلہ نیشنل کرکٹ اسٹیڈیم ڈھاکا میں ہوگا جبکہ دوسرا ٹیسٹ 16 سے 20 مئی تک سلہٹ انٹرنیشنل کرکٹ اسٹیڈیم میں کھیلا جائے گا۔

قومی کھلاڑیوں کا تربیتی کیمپ 27 اپریل کو کراچی میں شروع ہوگا جو یکم مئی تک جاری رہے گا۔ کھلاڑی 2 مئی کو بنگلہ دیش روانہ ہوں گے۔ ایچ بی ایل پی ایس ایل الیون میں مصروف کھلاڑی اپنی ٹیموں کی مہم ختم ہونے کے بعد کیمپ جوائن کریں گے، جبکہ فائنل کھیلنے والی ٹیموں کے کھلاڑی ٹورنامنٹ کے اختتام پر بنگلہ دیش روانہ ہوں گے۔

ٹیسٹ اسکواڈ میں شامل پانچ کھلاڑی اذان اویس، امام الحق، محمد غازی غوری، نعمان علی اور ساجد خان فی الحال لاہور میں این سی اے ریڈ بال کیمپ میں تربیت حاصل کر رہے ہیں۔

پی سی بی نے دورہ بنگلہ دیش کے لیے کوچنگ اسٹاف کا بھی اعلان کر دیا ہے۔ سابق ٹیسٹ کپتان سرفراز احمد کو ہیڈ کوچ مقرر کیا گیا ہے۔ سرفراز احمد کی بطور کپتان اور مینٹور خدمات نمایاں رہی ہیں جس میں آئی سی سی انڈر 19 ورلڈ کپ 2006 اور آئی سی سی چیمپئنز ٹرافی 2017 کی فتوحات شامل ہیں۔ اس کے علاوہ اسد شفیق بیٹنگ کوچ اور عمر گل باؤلنگ کوچ کے فرائض انجام دیں گے۔

سولہ رکنی اسکواڈ میں شان مسعود کپتان، عبداللہ فضل، عماد بٹ، اذان اویس، بابر اعظم، حسن علی، امام الحق، خرم شہزاد، محمد عباس، محمد رضوان، محمد غازی غوری، نعمان علی، ساجد خان، سلمان علی آغا، سعود شکیل اور شاہین شاہ آفریدی شامل ہیں۔