فارمولا ون تنقید: جارج رسل میکس ورسٹاپن کی حمایت میں سامنے آ گئے

فارمولا ون کے معروف ڈرائیور جارج رسل نے کہا ہے کہ اگر میکس ورسٹاپن کھیل کے نئے دور میں فارمولا ون سے کنارہ کشی اختیار کرنے کا فیصلہ کرتے ہیں تو انہیں اس پر حیرانی نہیں ہوگی۔

ایک ویڈیو کال کے دوران گفتگو کرتے ہوئے مرسڈیز کے ڈرائیور جارج رسل نے کہا کہ ریڈ بل کے چار بار کے عالمی چیمپئن میکس ورسٹاپن کی موجودہ مایوسی ایک فطری عمل ہے۔ ورسٹاپن مسلسل نئے قوانین اور انجنوں پر تنقید کرتے رہے ہیں اور انہوں نے اسے اینٹی ریسنگ قرار دیا ہے۔

جارج رسل کا کہنا تھا کہ فارمولا ون کسی بھی ایک ڈرائیور سے بڑی ہے تاہم ہم سب میکس کے ساتھ ریسنگ سے لطف اندوز ہوتے ہیں اور کوئی نہیں چاہے گا کہ وہ اس کھیل کو خیرباد کہیں۔ انہوں نے مزید کہا کہ ورسٹاپن نے اپنے کیریئر میں وہ سب کچھ حاصل کر لیا ہے جس کا ہر ڈرائیور خواب دیکھتا ہے۔

رسل کے مطابق چار بار کی عالمی چیمپئن شپ جیتنے کے بعد میکس ورسٹاپن کے پاس فارمولا ون میں ثابت کرنے کے لیے کچھ خاص نہیں بچا۔ انہوں نے کہا کہ ایک وقت ایسا آتا ہے جب انسان صرف وہی کام کرنا چاہتا ہے جس سے اسے خوشی ملے۔

میکس ورسٹاپن اس وقت جرمنی کے مشہور نوربرگ رنگ سرکٹ پر جی ٹی تھری اسپورٹس کار کے کوالیفائرز میں حصہ لے رہے ہیں اور ان کا ہدف اگلے ماہ ہونے والی چوبیس گھنٹے کی اینڈورنس ریس میں شرکت کرنا ہے۔

جارج رسل نے اعتراف کیا کہ اگر وہ خود چار بار کے عالمی چیمپئن ہوتے تو شاید وہ بھی وہی کچھ کر رہے ہوتے جو اس وقت ورسٹاپن کر رہے ہیں۔ انہوں نے کہا کہ ورسٹاپن اپنے کیریئر کے ایک مختلف مرحلے پر ہیں اور ان کے فیصلے کو سمجھنا مشکل نہیں ہے۔

رسل نے مزید کہا کہ فارمولا ون کے بدلتے ہوئے تکنیکی قوانین اور مسلسل سفر کے دباؤ کے باعث ڈرائیورز کے لیے کھیل میں برقرار رہنا مشکل ہوتا جا رہا ہے۔ انہوں نے کہا کہ کامیابیوں کے حصول کے بعد ذاتی اطمینان اور خوشی ہی وہ کلیدی عوامل ہیں جو کسی ڈرائیور کے مستقبل کا فیصلہ کرتے ہیں۔