پاکستان میں گاڑیوں کی فروخت میں 108 فیصد کا نمایاں اضافہ

پاکستان میں آٹوموبائل کی صنعت میں نمایاں بہتری دیکھی گئی ہے اور اپریل 2026 کے دوران گاڑیوں کی فروخت 22 ہزار یونٹس تک پہنچ گئی ہے۔ پاکستان آٹوموٹو مینوفیکچررز ایسوسی ایشن کے اعداد و شمار اور عارف حبیب لمیٹڈ کی رپورٹ کے مطابق گزشتہ برس کے اسی مہینے کے مقابلے میں فروخت میں 108 فیصد کا زبردست اضافہ ریکارڈ کیا گیا ہے۔ اس اعداد و شمار میں کاریں، ایل سی ویز، وینز، جیپیں اور الیکٹرک گاڑیاں شامل ہیں۔

مالی سال 2026 کے ابتدائی دس ماہ کے مجموعی اعداد و شمار پر نظر ڈالی جائے تو گاڑیوں کی فروخت میں 49 فیصد اضافہ ہوا ہے اور کل تعداد ایک لاکھ 66 ہزار 100 یونٹس تک پہنچ گئی ہے۔

اس نمو کی بنیادی وجوہات میں خریداری کی سرگرمیوں میں تیزی، آٹو فنانسنگ میں تسلسل اور اہم شعبوں میں گاڑیوں کی بڑھتی ہوئی مانگ شامل ہے۔ ماہانہ بنیادوں پر دیکھا جائے تو مارچ میں رمضان کے باعث فروخت میں کمی کے بعد اپریل میں حجم 42 فیصد بڑھ گیا ہے جس سے مارکیٹ میں بحالی کا رجحان ظاہر ہوتا ہے۔