گوادر میں ہر قسم کی تعمیرات پر پابندی کا خاتمہ، نوٹیفیکیشن جاری

گزشتہ چار سال سے گوادر میں عائد ہر قسم کی تعمیرات پر فی الفور پابندی ہٹا لی گئی ہے۔ ادارہ ترقیات گوادر ( گوادر ڈیولپمنٹ اتھارٹی) کی جانب سے جمعہ کے روزجاری کردہ نوٹی فیکیشن میں جی ڈی اے  ایکٹ 2003 کے سیکشن 9 کے تحت تجارتی، رہائشی، ریکریئشنل، ویئر ہاؤسسز کے لیئے این او سیز کا اجراء اب ممکن ہوگا۔

واضع رہے کہ گزشتہ چار سال سے گوادر ماسٹر پلان نہ ہونے کی وجہ سے ہر قسم  کی تعمیرات پر پابندی عائد کردی گئی تھی۔

ذرائع کا کہنا ہے کہ چین کی معاونت سے گوادر کے اسمارٹ سٹی ماسٹر پلان کی منظوری کے بعد پابندی ختم کردی گئی ہے۔

گوادر ماسٹر پلان نہ ہونے کی وجہ سے ہر قسم  کی تعمیرات پر پابندی عائد کردی گئی تھی

ڈائریکٹر جنرل گوادر ڈیولپمنٹ اتھارٹی کی جانب سے جاری کردہ نوٹی فیکیشن کی نقول تمام متعلقہ اداروں کو ارسال کردی گئی ہیں۔

جی ڈی اے کے اس اقدام کو ایسوسی ایشن آف بلڈرز اینڈ ڈیولپرز پاکستان (آباد) کے چیرمین محسن شیخانی نے سراہتے ہوئے کہا ہے کہ تعمیراتی کے آغاز سے گوادر میں سرمایہ کاروں کو ترغیب ملے گی۔

محسن شیخانی نے کہا ہے کہ حکومت کی جانب سے گوادر میں ہر قسم کی تعمیراتی پابندیوں کے خاتمے سے خصوصا” بلوچستان کے ہزاروں افراد کوروزگار کے مواقع میسر آئیں گے۔ انہوں نے کہا کہ ملک کے وسیع تر مفاد میں آباد حکومت کے ساتھ شانہ بشانہ ہے۔

تعمیراتی پابندیوں کے خاتمے سے خصوصا” بلوچستان کے ہزاروں افراد کوروزگار کے مواقع میسر آئیں گے، محسن شیخانی

آباد کے چیرمین کا کہنا تھا کہ وفاق اور صوبائی حکومتیں سندھ اور خصوصا” کراچی میں بلند و بالا تعمیراتی سرگرمیوں کی بحالی اور اس شعبے کی ترقی میں حائل رکاوٹوں کی دور کرنے کے لئے جنگی بنیادوں پر اقدامات کریں۔

محسن شیخانی نے کہا کہ حکومت کی توجہ سے تعمیراتی شعبے کے ذریعے اربوں روپے کا ریوینیو حاصل ہوسکتا ہے اور ساتھ ہی ہزاروں افراد کے روزگار کا ذریعہ بھی بنے گا۔

مزید پڑھیں: لاہور میں ہائی رائز کی اجازت احسن اقدام ہے، حکومت کراچی پر بھی فوری توجہ دے، محسن شیخانی