عید الفطر کے پہلے روز کراچی سمیت سندھ کے مختلف علاقوں میں بارش کا امکان

محکمہ موسمیات نے عید الفطر کے پہلے روز کراچی سمیت سندھ کے مختلف اضلاع میں بارش اور تیز ہواؤں کی پیش گوئی کر دی ہے۔ محکمہ موسمیات کے مطابق ایک مغربی ہواؤں کا سلسلہ ملک کے بیشتر حصوں پر اثر انداز ہو رہا ہے جس کے باعث عید کے دن موسم ابر آلود رہنے اور گرج چمک کے ساتھ بارش کا امکان ہے۔

کراچی ڈویژن کے علاوہ لاڑکانہ، قمبر شہداد کوٹ، شکارپور، جیکب آباد، سکھر، جامشورو، حیدرآباد، ٹھٹھہ، سجاول، بدین، مٹیاری، عمرکوٹ، میرپور خاص، نوشہرو فیروز، شہید بے نظیر آباد اور دادو کے اضلاع میں بھی بارش متوقع ہے۔ کراچی کے حوالے سے جاری تین روزہ پیش گوئی میں بتایا گیا ہے کہ شہر کا موسم زیادہ تر ابر آلود رہے گا جبکہ مضافاتی علاقوں میں کہیں کہیں گرج چمک کے ساتھ بارش ہو سکتی ہے۔

شہر میں دن کے اوقات میں درجہ حرارت 29 سے 31 ڈگری سینٹی گریڈ کے درمیان رہنے کا امکان ہے جبکہ رات کے وقت پارہ 17 سے 19 ڈگری سینٹی گریڈ تک گر سکتا ہے۔ صبح کے وقت ہوا میں نمی کا تناسب 80 سے 90 فیصد رہے گا جو شام تک کم ہو کر 50 سے 60 فیصد تک آ جائے گا۔ اتوار 22 مارچ کو شہر کا موسم جزوی طور پر ابر آلود رہے گا اور درجہ حرارت 31 سے 33 ڈگری سینٹی گریڈ کے درمیان متوقع ہے۔

محکمہ موسمیات نے سندھ کے لیے خبردار کیا ہے کہ اس دوران مضافاتی علاقوں میں آسمانی بجلی گرنے کے واقعات بھی پیش آ سکتے ہیں، جس کے پیش نظر کسانوں کو اپنی فصلوں کے انتظام کے لیے احتیاطی تدابیر اختیار کرنے کا مشورہ دیا گیا ہے۔

واضح رہے کہ بدھ کے روز کراچی میں ہونے والی شدید بارشوں اور طوفان کے نتیجے میں پیش آنے والے مختلف حادثات میں 20 افراد جاں بحق اور 8 زخمی ہوئے تھے۔ بدھ کی شب 11 بجے تک ریکارڈ کیے گئے اعداد و شمار کے مطابق سب سے زیادہ بارش کورنگی میں 55.6 ملی میٹر ریکارڈ کی گئی، جبکہ ناظم آباد میں 29.6 ملی میٹر اور پی اے ایف مسرور بیس پر 22 ملی میٹر بارش ہوئی۔