ملک کو درپیش چیلنجز سے نمٹنے کے لیے قومی اتحاد اور استحکام ناگزیر ہے، اسپیکر پنجاب اسمبلی

اسپیکر پنجاب اسمبلی ملک محمد احمد خان نے یوم پاکستان کے موقع پر قوم پر زور دیا ہے کہ ملکی ترقی اور درپیش چیلنجز پر قابو پانے کے لیے اتحاد، جمہوریت اور قومی ہم آہنگی کو فروغ دیا جائے۔ انہوں نے کہا کہ 23 مارچ 1940 کا دن برصغیر کے مسلمانوں کی تاریخ میں ایک فیصلہ کن موڑ کی حیثیت رکھتا ہے، جب قرارداد لاہور نے ایک آزاد، خودمختار اور فلاحی ریاست کی بنیاد رکھی۔

ملک محمد احمد خان کا کہنا تھا کہ یہ قرارداد ایک الگ وطن کے تصور کو تقویت دینے اور قیامِ پاکستان کی تاریخی جدوجہد کا نقطہ آغاز ثابت ہوئی۔ انہوں نے کہا کہ یوم پاکستان ہمیں بانیانِ قوم کی قربانیوں، بصیرت اور عزم کی یاد دلاتا ہے، اور یہ ہم سب کی اجتماعی ذمہ داری ہے کہ ہم استحکام، ترقی اور جمہوری عمل کے تسلسل کے ذریعے ان کے ورثے کی پاسداری کریں۔

اسپیکر پنجاب اسمبلی نے اس عزم کا اظہار کیا کہ معاشی اور سکیورٹی سمیت ملک کو درپیش مسائل کا حل باہمی اتحاد اور مشترکہ کوششوں میں مضمر ہے۔ انہوں نے واضح کیا کہ ریاستی ادارے پائیدار ترقی، معاشی استحکام اور جمہوریت کی مضبوطی کے لیے پرعزم ہیں۔

ملک محمد احمد خان نے ملکی دفاع، دہشت گردی کے خاتمے اور قومی سلامتی کو یقینی بنانے کے لیے مسلح افواج کی قربانیوں کو خراجِ تحسین پیش کرتے ہوئے ان کے کردار کو ملکی خودمختاری کے لیے ناگزیر قرار دیا۔

عالمی اور علاقائی صورتحال پر بات کرتے ہوئے انہوں نے امن، رواداری اور مذاکرات کی اہمیت پر زور دیا اور مشرق وسطیٰ سمیت تنازعات کا شکار خطوں میں پائیدار امن اور مسلم دنیا کے اتحاد کے لیے نیک خواہشات کا اظہار کیا۔

انہوں نے نئی نسل کو نظریہ پاکستان، آئینی بالادستی اور جمہوری اقدار سے روشناس کرانے پر زور دیتے ہوئے کہا کہ اتحاد، ایمان اور تنظیم کے اصولوں پر عمل پیرا ہو کر ہی قوم ایک روشن اور خوشحال مستقبل کی جانب گامزن ہو سکتی ہے۔