گلگت بلتستان میں موسمیاتی تبدیلیوں کے مقامی زندگی پر گہرے اثرات

پاکستان کے شمالی علاقے ہنزہ میں موسم سرما کے بدلتے تیوروں نے مقامی روایات اور کھیلوں کو شدید متاثر کرنا شروع کر دیا ہے۔ وادی کے تاریخی قلعہ التیت کے پہلو میں واقع وہ تالاب جہاں دہائیوں سے سردیوں میں برفانی ہاکی کا میدان سجتا تھا، اب موسمیاتی تبدیلیوں کی نذر ہو رہا ہے۔

ہنزہ کی مقامی کھلاڑی اور ویمن ہاکی ٹیم کی کپتان 21 سالہ علینہ گل کا کہنا ہے کہ 2018 اور موجودہ دور میں زمین آسمان کا فرق آ چکا ہے۔ یونیورسٹی سے چار سال بعد واپسی پر وہ دوبارہ ہاکی کھیلنے کی خواہشمند تھیں، تاہم انہیں اب سردیوں کے معمول کے مطابق آنے کا انتظار ہے۔

موسمیاتی تجزیاتی پلیٹ فارم ویدر والے کے اعداد و شمار کے مطابق 2010 کی دہائی کے اواخر سے اب تک موسم سرما کی بارشوں اور برف باری میں تقریباً 30 فیصد کمی دیکھی گئی ہے۔ گزشتہ چار برسوں سے موسم سرما کا دورانیہ معمول سے کم اور درجہ حرارت 2 سے 3 ڈگری سینٹی گریڈ زیادہ ریکارڈ کیا گیا ہے۔

مقامی سطح پر منعقد ہونے والا قراقرم انٹرلیوڈ ٹورنامنٹ مکمل طور پر قدرتی برف پر انحصار کرتا ہے۔ التیت ٹاؤن مینجمنٹ سوسائٹی کے صدر صادق سلیم کے مطابق 2024 میں برف باری اور درجہ حرارت کے معمولات میں اچانک اور غیر متوقع تبدیلیاں دیکھی گئی ہیں۔

ٹورنامنٹ کے منتظمین نے رواں سال بھی منفی 20 ڈگری سینٹی گریڈ درجہ حرارت میں رات بھر جاگ کر تالاب میں پانی ڈال کر سطح ہموار کرنے کی کوشش کی، تاہم سورج کی تپش نے تمام محنت رائیگاں کر دی۔ برف کی تہہ اتنی نازک تھی کہ افتتاحی میچ منسوخ کرنا پڑا۔

صورتحال کو دیکھتے ہوئے منتظمین نے ٹورنامنٹ کو التیت سے دو گھنٹے شمال کی جانب سوست منتقل کیا، جہاں بلندی زیادہ ہونے کے باعث برف کے جمنے کے امکانات بہتر تھے۔ تاہم وہاں بھی موسمی تبدیلیوں نے کھلاڑیوں کو مایوس کیا۔

یہ بحران صرف کھیلوں تک محدود نہیں بلکہ ہنزہ کی سیاحت اور معیشت پر بھی اثر انداز ہو رہا ہے۔ ہوٹل مالکان اور ٹرانسپورٹ آپریٹرز کو پائپ لائنوں کے پھٹنے اور غیر متوقع موسم کے باعث بھاری نقصانات کا سامنا ہے۔ ماہرین کے مطابق ہندوکش اور ہمالیہ کے خطے میں برفانی موسم کا دورانیہ مختصر ہوتا جا رہا ہے، جس سے سیاحتی سرگرمیاں بری طرح متاثر ہو رہی ہیں۔