صدر آصف علی زرداری کی پیٹرولیم مصنوعات کی قیمتوں میں کمی اور عوام کو ریلیف دینے کی ہدایت

صدر مملکت آصف علی زرداری نے حکومت کو ہدایت کی ہے کہ عوام کو ریلیف فراہم کرنے کے لیے پیٹرولیم مصنوعات کی قیمتوں کا بوجھ کم سے کم کیا جائے۔ نوڈیرو میں بھٹو ہاؤس میں منعقدہ اجلاس کے دوران صدر مملکت نے وزیر داخلہ محسن نقوی، وزیر خزانہ محمد اورنگزیب اور وزیر پیٹرولیم علی پرویز ملک سے ملاقات کی۔

اجلاس میں ملکی معاشی صورتحال، توانائی کے شعبے اور پیٹرولیم مصنوعات کی قیمتوں میں اضافے کے اثرات کا تفصیلی جائزہ لیا گیا۔ صدر زرداری نے وزراء پر زور دیا کہ معاشی پالیسیوں میں عوامی ریلیف کو اولین ترجیح دی جائے اور علاقائی صورتحال کو مدنظر رکھتے ہوئے عام آدمی پر بوجھ کم کرنے کے اقدامات کیے جائیں۔

وزیر داخلہ نے صدر مملکت کو انسداد دہشت گردی کے جاری آپریشنز، پاک افغان سرحد کی صورتحال اور مجموعی سیکیورٹی چیلنجز پر بریفنگ دی۔ اجلاس میں پاکستان پیپلز پارٹی کے چیئرمین بلاول بھٹو زرداری، وزیراعلیٰ سندھ مراد علی شاہ اور صوبائی وزیر ناصر حسین بھی شریک تھے۔

دوسری جانب وزیراعظم شہباز شریف نے وزیر برائے فوڈ سیکیورٹی رانا تنویر کے ساتھ اجلاس میں ملک میں اشیائے خوردونوش کے ذخائر کا جائزہ لیا۔ وزیر برائے فوڈ سیکیورٹی نے وزیراعظم کو یقین دلایا کہ ملک بھر میں بنیادی اشیاء وافر مقدار میں دستیاب ہیں۔ اجلاس میں خلیجی ممالک کو غذائی اجناس کی برآمدات سے متعلق پیش رفت پر بھی تبادلہ خیال کیا گیا۔

خیال رہے کہ رواں ماہ کے اوائل میں حکومت نے پیٹرول اور ڈیزل کی قیمتوں میں پچپن روپے فی لیٹر تک کا اضافہ کیا تھا، جس کی وجہ عالمی منڈی میں خام تیل کی قیمتوں میں تیزی اور سپلائی چین میں تعطل کو قرار دیا گیا تھا۔ تاہم بعد ازاں وزیراعظم شہباز شریف نے اعلان کیا تھا کہ عالمی منڈی میں قیمتیں بڑھنے کے باوجود پیٹرولیم مصنوعات کی قیمتوں میں مزید اضافہ نہیں کیا جائے گا۔