وزیراعظم شہباز شریف اور بلاول بھٹو کی ملاقات، قومی سلامتی اور علاقائی صورتحال پر تبادلہ خیال

اسلام آباد میں وزیراعظم ہاؤس کے اندر ایک اہم اجلاس کا انعقاد کیا گیا جس میں علاقائی کشیدگی اور قومی سلامتی کے امور پر تفصیلی غور و خوض کیا گیا۔ اجلاس کی صدارت وزیراعظم شہباز شریف نے کی جس میں چیئرمین پیپلز پارٹی بلاول بھٹو زرداری، وزیراعلیٰ سندھ مراد علی شاہ اور وزیراعلیٰ بلوچستان سرفراز بگٹی کے علاوہ وفاقی وزراء نے بھی شرکت کی۔

اجلاس کے دوران مشرق وسطیٰ کی موجودہ کشیدہ صورتحال اور ملک کی سیاسی و داخلی سلامتی پر تبادلہ خیال کیا گیا۔ وزیراعظم نے بلاول بھٹو زرداری کو ایران اور خطے میں جاری تنازع کے حوالے سے پاکستان کے کردار اور اقدامات سے آگاہ کیا۔

اس موقع پر وزیراعظم نے صوبائی وزرائے اعلیٰ کو ان کے متعلقہ صوبوں میں اسمارٹ لاک ڈاؤن کے نفاذ کی حکمت عملی کے بارے میں ہدایات جاری کیں۔ شرکاء نے ملکی مفادات کے تحفظ کے لیے مربوط لائحہ عمل اپنانے پر اتفاق کیا۔

وزیراعظم شہباز شریف آج شام ایوان صدر میں صدر مملکت آصف علی زرداری سے بھی ملاقات کریں گے۔ اس ملاقات میں بھی علاقائی صورتحال اور اسمارٹ لاک ڈاؤن کے نفاذ کے امور زیر بحث آئیں گے۔ ذرائع کے مطابق وزیراعظم صدر مملکت کو امریکہ اور ایران کے درمیان ممکنہ ثالثی کے حوالے سے حکومتی فیصلوں اور پیش رفت پر بریفنگ دیں گے۔