وزیراعلیٰ خیبر پختونخوا کا ٹرمپ کے سامنے شہباز شریف کو وزیراعظم تسلیم کرنے کا بیان

اسلام آباد میں ایک پریس کانفرنس سے خطاب کرتے ہوئے وزیر اعلیٰ خیبر پختونخوا سہیل آفریدی نے کہا ہے کہ شہباز شریف پاکستان کے وزیر اعظم ہیں اور کسی بھی بیرونی جارحیت کے خلاف ہم ایک قوم بن کر کھڑے ہیں۔ اس موقع پر ان کے ہمراہ جنید اکبر اور مزمل اسلم بھی موجود تھے۔

ایک سوال کے جواب میں سہیل آفریدی نے کہا کہ وہ صدر ٹرمپ کو یہ واضح کرنا چاہتے ہیں کہ شہباز شریف پاکستان کے وزیر اعظم ہیں، تاہم اسرائیل اور امریکہ کبھی نہیں چاہیں گے کہ پاکستان ترقی کرے۔ انہوں نے دعویٰ کیا کہ کوئی بھی یہودی ریاست ایک اسلامی ایٹمی طاقت کو ترقی کرتا نہیں دیکھنا چاہتی۔

وزیر اعلیٰ نے کہا کہ پی ٹی آئی کے بانی کو نااہل قرار دینے کا اختیار صرف عوام کے پاس ہے اور ان کی جماعت عوامی حمایت سے حقیقی آزادی حاصل کرے گی۔ انہوں نے وفاقی حکومت پر کڑی تنقید کرتے ہوئے کہا کہ مرکز خیبر پختونخوا کے ساتھ سوتیلی ماں جیسا سلوک کر رہا ہے۔

سہیل آفریدی نے انکشاف کیا کہ نیشنل فنانس کمیشن سمیت مالی معاملات پر ہونے والا طے شدہ اجلاس بغیر کسی وضاحت کے منسوخ کر دیا گیا۔ انہوں نے الزام لگایا کہ ملک کو درپیش فیصلے بند کمروں میں شفافیت کے بغیر کیے جا رہے ہیں، جس کے اثرات کسی ایک ادارے یا خاندان تک نہیں بلکہ پورے پاکستان پر مرتب ہوں گے۔

ان کا مزید کہنا تھا کہ پی ٹی آئی اور اس کی قیادت بشمول بانی اور ان کے اہل خانہ غیر معمولی سیاسی دباؤ کا شکار ہیں۔ انہوں نے اسلام آباد پر الزام عائد کیا کہ وہ کے پی حکومت کو نظر انداز کر رہی ہے اور توانائی کے بحران جیسے اہم معاملات پر ہونے والی مشاورت میں شامل نہیں کیا جا رہا۔

ملک کی معاشی صورتحال پر تشویش کا اظہار کرتے ہوئے سہیل آفریدی نے کہا کہ پاکستان کا تجارتی خسارہ 20 ارب ڈالر سے تجاوز کر چکا ہے، زرعی شعبے کی ترقی تنزلی کا شکار ہے اور بڑی تعداد میں نوجوان بہتر مستقبل کی تلاش میں بیرون ملک جانے پر مجبور ہیں۔