پی ٹی آئی کی قاسم خان کے خلاف ‘منفی پروپیگنڈا’ کی شدید مذمت

پاکستان تحریک انصاف نے موجودہ حکومتی اتحاد کو نالائق اور فسطائی قرار دیتے ہوئے قاسم خان، جو کہ بانی پی ٹی آئی عمران خان کے صاحبزادے ہیں، کے خلاف زہریلے اور گمراہ کن پروپیگنڈے کی شدید مذمت کی ہے۔ ترجمان کا کہنا ہے کہ حکومتی حلقے ملکی سنگین مسائل اور سیاسی انتقام سے عوام کی توجہ ہٹانے کے لیے جھوٹے بیانیے گھڑ رہے ہیں۔

پی ٹی آئی کے مرکزی سیکریٹری اطلاعات شیخ وقاص اکرم نے اس مہم کو بدنیتی پر مبنی قرار دیتے ہوئے کہا کہ غیر نمائندہ حکومت نے ایک بیٹے کی اپنے والد سے ملاقات کی جذباتی اپیل کو سیاسی رنگ دینے کی شرمناک کوشش کی ہے۔ انہوں نے واضح کیا کہ اقوام متحدہ کی انسانی حقوق کونسل میں قاسم خان کے خطاب کے الفاظ کو سیاسی مفادات کے لیے توڑ مروڑ کر پیش کیا جا رہا ہے۔

شیخ وقاص اکرم نے اس بات پر زور دیا کہ نہ تو قاسم خان اور نہ ہی پارٹی کے سینئر رہنما زلفی بخاری نے کوئی ایسا بیان دیا جس سے ملکی مفادات کو نقصان پہنچے۔ انہوں نے عالمی فورم پر پاکستان کا موقف انتہائی واضح اور موثر انداز میں پیش کیا۔

ترجمان نے ان دعووں کو یکسر مسترد کر دیا کہ قاسم خان نے پاکستان کے جی ایس پی پلس اسٹیٹس کو معطل کرنے کا مطالبہ کیا ہے۔ انہوں نے کہا کہ یہ پروپیگنڈا کرنے والوں کا جھوٹ ہے۔ حقیقت یہ ہے کہ قاسم خان کی تقریر کا محور انسانی حقوق کی خلاف ورزیاں اور اپنے والد کی غیر قانونی حراست کے خلاف ایک بیٹے کی فریاد تھی۔

شیخ وقاص اکرم نے مزید کہا کہ قاسم خان نے اپنے خطاب میں جی ایس پی پلس فریم ورک کے لیے پاکستان کی حمایت کا اعادہ کیا۔ انہوں نے کہا کہ یہ تقریر حب الوطنی پر مبنی تھی جس کا مقصد صرف انسانی حقوق کی پامالیوں کو اجاگر کرنا تھا نہ کہ ملکی مفادات کو نقصان پہنچانا۔