بنوں: شدید بارش کے باعث مکان کی چھت گر گئی، تین بچے جاں بحق، دو زخمی

بنوں میں موسلا دھار بارش کے دوران مکان کی چھت گرنے سے تین بچے جاں بحق اور دو زخمی ہو گئے۔ افسوسناک واقعہ اس وقت پیش آیا جب شیر محمد نامی شہری کے گھر کی چھت منہدم ہو گئی جس کے ملبے تلے پانچ بچے دب گئے۔ مقامی ذرائع کے مطابق جاں بحق ہونے والوں میں دو بیٹیاں اور ایک بیٹا شامل ہے جبکہ ریسکیو آپریشن کے دوران دو زخمی بیٹوں کو بحفاظت نکال کر ہسپتال منتقل کر دیا گیا ہے۔

ملک بھر میں جاری بارشوں کا سلسلہ خیبر پختونخوا، پنجاب، اسلام آباد اور کراچی تک پھیل چکا ہے۔ پنجاب کے مختلف شہروں بشمول لاہور، جھنگ، بہاولپور، میانوالی، یزمان، چولستان اور راولپنڈی میں بھی ابر کرم برسا۔ وفاقی دارالحکومت اسلام آباد میں بھی وقفے وقفے سے بارش کا سلسلہ جاری رہا۔

لاہور میں موسلا دھار بارش کے باعث نشیبی علاقے زیر آب آ گئے اور شہر کے کئی حصوں میں بجلی کا نظام درہم برہم ہونے سے متعدد علاقے تاریکی میں ڈوب گئے۔ محکمہ موسمیات نے پیش گوئی کی ہے کہ صوبائی دارالحکومت میں وقفے وقفے سے بارش کا سلسلہ اکتیس مارچ تک جاری رہ سکتا ہے۔

محکمہ موسمیات کے مطابق آئندہ دنوں کے دوران کراچی سمیت بلوچستان کے مختلف شہروں بشمول کوئٹہ میں بھی مزید بارشوں کا امکان ہے۔ حکام کی جانب سے متاثرہ علاقوں میں امدادی کارروائیاں جاری ہیں جبکہ شہریوں کو احتیاطی تدابیر اختیار کرنے کی ہدایت کی گئی ہے۔