اسرائیلی سازشوں کو ناکام بنانے کے لیے امتِ مسلمہ کا اتحاد ناگزیر ہے، حافظ طاہر اشرفی

پاکستان علماء کونسل کے چیئرمین حافظ طاہر محمود اشرفی نے کہا ہے کہ اسرائیل مسلمانوں کو آپس میں لڑانے کے درپے ہے اور پاکستان کے جوہری پروگرام کے خلاف سازشیں کر رہا ہے۔ لاہور میں استحکام پاکستان کانفرنس سے خطاب کرتے ہوئے انہوں نے کہا کہ موجودہ صورتحال میں جذباتی فیصلوں کے بجائے اجتماعی دانشمندی اور ضبط و تحمل کی ضرورت ہے۔ دشمن قوتیں مسلم ممالک کے درمیان خلیج پیدا کرنے کی کوشش کر رہی ہیں۔

حافظ طاہر محمود اشرفی نے کہا کہ اسرائیل اور ایران کے درمیان حالیہ کشیدگی کے دوران بچیوں کے اسکول کو نشانہ بنایا گیا لیکن عالمی سطح پر انسانی ہمدردی کا ردعمل مایوس کن رہا۔ انہوں نے معصوم شہریوں پر حملوں کو پوری مسلم دنیا کے لیے انتہائی المناک قرار دیا۔ ان کا کہنا تھا کہ کچھ عناصر عرب ممالک اور ایران کے درمیان تناؤ پیدا کرنے کے لیے کوشاں ہیں، جبکہ بیرونی خطرات سے نمٹنے کے لیے مسلم ریاستوں کا اتحاد وقت کی اہم ضرورت ہے۔

انہوں نے بتایا کہ وزیر اعظم شہباز شریف نے ایرانی صدر سے تفصیلی ٹیلی فونک رابطہ کیا ہے، جبکہ ترکیہ، مصر اور سعودی عرب کے وزرائے خارجہ بھی پرامن حل تلاش کرنے کے لیے پاکستان کے دورے کر رہے ہیں۔ انہوں نے واضح کیا کہ حرمین شریفین کا تحفظ ہر مسلمان کے ایمان کا حصہ ہے اور ان مقدس مقامات کو پہنچنے والا کوئی بھی نقصان ناقابل برداشت ہے۔ حافظ طاہر محمود اشرفی نے پیغام پاکستان کو قومی وحدت کا ضامن قرار دیتے ہوئے زور دیا کہ مسلم ممالک کے رہنماؤں کو مکہ مکرمہ میں جمع ہو کر درپیش چیلنجز کے خلاف مشترکہ حکمت عملی وضع کرنی چاہیے۔