زخمی ہونے کے باوجود نائب وزیراعظم اسحاق ڈار کا کل دورہ چین متوقع

نائب وزیراعظم اور وزیر خارجہ اسحاق ڈار چینی ہم منصب کی دعوت پر 31 مارچ کو چین کا دورہ کریں گے۔ دفتر خارجہ کے ترجمان کے مطابق یہ دورہ دونوں ممالک کے درمیان قائم تزویراتی شراکت داری کو مزید مستحکم کرنے کی ایک کڑی ہے۔

پاکستان اور چین کے مابین ہر موسم کی دوستی ایک مثالی تعلق ہے اور دونوں ممالک علاقائی و عالمی امور پر باقاعدگی سے مشاورت کرتے رہتے ہیں۔ اس دورے کے دوران باہمی دلچسپی کے امور اور عالمی صورتحال پر تفصیلی بات چیت کی جائے گی۔

ترجمان نے مزید بتایا کہ کندھے کی ہڈی فریکچر ہونے کے باعث طبی ماہرین نے اسحاق ڈار کو آرام کا مشورہ دیا تھا تاہم اس کے باوجود ان کا یہ دورہ اس بات کا عکاس ہے کہ پاکستان چین کے ساتھ اپنے تعلقات کو کس قدر اہمیت دیتا ہے۔