پیٹرول کی قیمتوں میں ہوشربا اضافے کے خلاف لاہور ہائیکورٹ میں درخواست دائر

لاہور ہائی کورٹ میں پیٹرولیم مصنوعات کی قیمتوں میں حالیہ اضافے کو چیلنج کر دیا گیا ہے۔ یہ درخواست جوڈیشل ایکٹیوزم پینل کی جانب سے ایڈووکیٹ اظہر صدیق نے دائر کی۔

درخواست میں موقف اختیار کیا گیا ہے کہ حکومت کی جانب سے پیٹرول کی قیمتوں میں کیا گیا اضافہ غیر قانونی اور عوامی مفادات کے منافی ہے۔ پٹیشن کے مطابق قیمتوں میں یہ بے تحاشا اضافہ عام آدمی کی قوت خرید سے باہر ہے جس سے عوام شدید متاثر ہوں گے۔

درخواست گزار نے عدالت کو آگاہ کیا کہ ایندھن کی قیمتوں میں اضافے کے نتیجے میں ٹرانسپورٹ، بجلی، زرعی اجناس اور بنیادی اشیائے خوردونوش کی قیمتوں میں ہوشربا اضافے کا خدشہ ہے۔

عدالت سے استدعا کی گئی ہے کہ پیٹرولیم مصنوعات کی قیمتوں میں کیا گیا حالیہ اضافہ کالعدم قرار دیا جائے اور حکومت کو عوام کو ریلیف فراہم کرنے کے لیے ہنگامی اقدامات کرنے کا حکم دیا جائے۔

واضح رہے کہ ایک روز قبل حکومت نے پیٹرولیم مصنوعات کی قیمتوں میں تاریخ ساز اضافہ کیا تھا، جس کے بعد پیٹرول کی فی لیٹر قیمت 458 روپے 40 پیسے جبکہ ہائی اسپیڈ ڈیزل کی قیمت 520 روپے 35 پیسے تک پہنچ گئی ہے۔ یہ ملکی تاریخ میں ایندھن کی بلند ترین قیمتیں ہیں۔