اسلام آباد، خیبر پختونخوا اور شمالی علاقہ جات میں 6.3 شدت کے زلزلے کے جھٹکے

پاکستان کے مختلف شہروں میں جمعہ کے روز زلزلے کے شدید جھٹکے محسوس کیے گئے ہیں جن کی شدت ریکٹر اسکیل پر چھ اعشاریہ تین ریکارڈ کی گئی۔ زلزلے کا مرکز زمین کی ایک سو نوے کلومیٹر گہرائی میں تھا۔

زلزلے کے جھٹکے وفاقی دارالحکومت اسلام آباد، راولپنڈی، پنجاب کے مختلف اضلاع، خیبر پختونخوا، گلگت بلتستان اور آزاد کشمیر میں محسوس کیے گئے۔

اسلام آباد اور راولپنڈی کے رہائشیوں نے زلزلے کے نمایاں جھٹکے محسوس کیے جبکہ پشاور، سوات، شانگلہ، نوشہرہ اور ہنگو میں جھٹکوں کی شدت زیادہ رہی۔

زلزلہ لوئر دیر، مردان، ہری پور، مانسہرہ اور ایبٹ آباد کے علاوہ پنجاب کے شہروں فیصل آباد، سرگودھا، اٹک، اوکاڑہ، قصور اور چنیوٹ میں بھی محسوس کیا گیا۔

زلزلے کی لہریں مظفر آباد، سکردو اور غذر تک پہنچیں جبکہ شیخوپورہ، وزیر آباد اور مری میں بھی زمین لرز اٹھی۔

خیبر پختونخوا کے دیگر علاقوں بشمول بنوں، کرک، مالاکنڈ اور لنڈی کوتل میں بھی زلزلے کے جھٹکے ریکارڈ کیے گئے۔

ابتدائی اطلاعات کے مطابق کسی جانی نقصان یا بڑے پیمانے پر مالی نقصان کی اطلاع موصول نہیں ہوئی تاہم متعلقہ حکام صورتحال کی مسلسل نگرانی کر رہے ہیں۔