اسلام آباد ہائی کورٹ کا عمران خان کی وکلاء سے ملاقات کرانے کا حکم

اسلام آباد ہائی کورٹ نے بانی پی ٹی آئی عمران خان اور ان کے وکیل بیرسٹر سلمان صفدر کے درمیان ملاقات کا حکم دے دیا ہے۔ عدالت نے جیل حکام کو ہدایت کی ہے کہ کل بروز بدھ دوپہر دو بجے ملاقات کا اہتمام کیا جائے۔

یہ احکامات چیف جسٹس سرفراز ڈوگر اور جسٹس محمد آصف پر مشتمل دو رکنی بنچ نے 190 ملین پاؤنڈ کیس اور سزا معطلی کی درخواستوں کی سماعت کے دوران جاری کیے۔ سماعت کے دوران نیب کے پراسیکیوٹرز اور بیرسٹر سلمان صفدر نے اپنے دلائل پیش کیے۔

بیرسٹر سلمان صفدر نے عدالت سے استدعا کی تھی کہ اپیلوں پر مزید کارروائی سے قبل انہیں اپنے موکل سے ملاقات کی اجازت دی جائے۔ چیف جسٹس نے اس استدعا کو منظور کرتے ہوئے جیل حکام کو ملاقات میں سہولت فراہم کرنے کا حکم دیا اور ریمارکس دیے کہ وکیل کی اپنے موکل سے مشاورت کے بعد اپیلوں پر سماعت کا شیڈول طے کیا جائے گا۔ عدالت نے اس عزم کا اظہار کیا کہ دلائل شروع ہونے کے بعد اپیلوں کا فیصلہ سات روز کے اندر کرنے کی کوشش کی جائے گی۔

اس سے قبل بیرسٹر سلمان صفدر نے ایک درخواست دائر کی تھی جس میں اڈیالہ جیل حکام کو بانی پی ٹی آئی اور بشریٰ بی بی سے قانونی معاملات پر بات چیت کے لیے ملاقات کرانے کا حکم مانگا گیا تھا۔ درخواست میں موقف اختیار کیا گیا تھا کہ 20 دسمبر 2025 سے بانی پی ٹی آئی کو اپنے وکلاء سے کسی بھی موثر ملاقات کا موقع نہیں ملا۔

درخواست گزار وکیل کا کہنا تھا کہ تقریباً تین ماہ اور بارہ روز سے انہیں قانونی رسائی سے محروم رکھا گیا ہے جس کی وجہ سے اہم قانونی نوعیت کے مقدمات کی تیاری میں شدید مشکلات کا سامنا ہے۔