مشرقِ وسطیٰ کی کشیدہ صورتحال: پاکستان سے 76 بین الاقوامی پروازیں منسوخ

اسلام آباد سمیت ملک بھر کے بڑے ہوائی اڈوں سے مشرق وسطیٰ جانے والی 76 بین الاقوامی پروازیں منسوخ کر دی گئی ہیں جس کے باعث مسافروں کو شدید مشکلات کا سامنا ہے۔

ایوی ایشن ذرائع کے مطابق کراچی سے دبئی، شارجہ، ابوظہبی، بحرین، کویت اور ریاض جانے والی متعدد پروازیں منسوخ کی گئی ہیں۔ اسی طرح لاہور سے کویت، ریاض، ابوظہبی، جدہ، فجیرہ، دمام اور دبئی جانے والی پروازیں بھی آج منگل کے روز روانہ نہیں ہو سکیں۔

اسلام آباد سے العین، فجیرہ، بحرین، شارجہ اور دبئی کے لیے پروازوں کا سلسلہ بھی معطل رہا۔ اس کے علاوہ پشاور سے دبئی، ابوظہبی، شارجہ، فجیرہ اور دوحہ جانے والی پروازیں بھی آج کے دن کے لیے منسوخ کر دی گئی ہیں۔

ملکی سطح پر بھی فضائی آپریشن شدید متاثر ہوا ہے۔ اسلام آباد اور گلگت کے درمیان پروازیں منسوخ کی گئی ہیں جبکہ کراچی سے لاہور، کوئٹہ، سکھر اور ملتان جانے اور آنے والی کئی پروازیں بھی آپریشنل نہیں ہو سکیں۔