ایران سے معاہدے کی مہلت ختم ہونے پر پوری تہذیب تباہ ہو جائے گی، ڈونلڈ ٹرمپ کی دھمکی

واشنگٹن (ایجنسیاں) ڈونلڈ ٹرمپ نے ایران کو سخت تنبیہ کرتے ہوئے کہا ہے کہ اگر تہران نے منگل کی ڈیڈ لائن تک معاہدہ نہ کیا تو ایک پوری تہذیب ختم ہو جائے گی۔ ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ معاہدہ نہ ہونے کی صورت میں ناقابل تلافی تباہی ہو سکتی ہے جسے انہوں نے عالمی تاریخ کے اہم ترین لمحات میں سے ایک قرار دیا۔ انہوں نے واضح کیا کہ وہ ایسی صورتحال کے خواہاں نہیں تاہم سفارت کاری کی ناکامی کی صورت میں یہ ایک ممکنہ نتیجہ ہے۔

دوسری جانب جے ڈی وانس نے دعویٰ کیا ہے کہ امریکہ ایران کے ساتھ جاری تنازع میں اپنے زیادہ تر فوجی اہداف حاصل کر چکا ہے۔ انہوں نے امید ظاہر کی کہ واشنگٹن کو مقررہ وقت کے اندر تہران کی جانب سے جواب موصول ہو جائے گا جس سے امریکی انتظامیہ میں ایک محتاط پرامیدی پائی جاتی ہے۔

اس صورتحال کے برعکس ایران کی پاسداران انقلاب نے سخت ردعمل کا اظہار کیا ہے۔ سرکاری ٹیلی ویژن پر نشر ہونے والے بیان میں خبردار کیا گیا ہے کہ اگر امریکہ نے کسی بھی ریڈ لائن کو عبور کیا تو ایران مشرق وسطیٰ سے باہر بھی انتقامی کارروائیوں کا دائرہ کار وسیع کر دے گا۔

پاسداران انقلاب نے دھمکی دی ہے کہ وہ امریکہ اور اس کے اتحادیوں کے اہم بنیادی ڈھانچے کو نشانہ بنا سکتے ہیں جس کے نتیجے میں انہیں برسوں تک تیل اور گیس کی رسد سے محروم ہونا پڑ سکتا ہے۔ اس انتباہ نے تنازع کے عالمی سطح پر پھیلنے کے خدشات کو جنم دیا ہے جس سے معاشی اور جغرافیائی سیاسی بحران کا خطرہ بڑھ گیا ہے۔ خطے میں کشیدگی عروج پر ہے اور دنیا بھر کی نظریں اس بات پر مرکوز ہیں کہ آیا سفارتی پیش رفت ہوگی یا صورتحال مزید سنگین رخ اختیار کر جائے گی۔