عالمی منڈی میں تیل کی قیمتوں میں بڑی گراوٹ، پاکستان میں پیٹرول سستا ہونے کا امکان

عالمی منڈی میں خام تیل کی قیمتوں میں نمایاں کمی کے بعد پاکستان میں پیٹرولیم مصنوعات کی قیمتوں میں بڑی گراوٹ کا امکان پیدا ہو گیا ہے۔ خطے میں جنگ بندی کے بعد عالمی سطح پر تیل کی قیمتیں تقریباً پندرہ فیصد تک گر چکی ہیں جس کے اثرات مقامی سطح پر مرتب ہوں گے۔

صنعتی ذرائع کے مطابق پیٹرول کی قیمت میں ساٹھ سے ستر روپے جبکہ ہائی اسپیڈ ڈیزل کی قیمت میں ایک سو دس روپے فی لیٹر تک کمی متوقع ہے۔ یہ ریلیف مہنگائی سے متاثرہ عوام کے لیے ایک بڑی خوشخبری ثابت ہو سکتا ہے۔

وزیراعظم شہباز شریف نے پیٹرولیم مصنوعات کی قیمتوں میں ممکنہ کمی کا جائزہ لینے کے لیے متعلقہ حکام کو ہدایات جاری کر دی ہیں۔ وفاقی حکومت نے قیمتوں کے تعین کے حوالے سے تفصیلی مشاورت شروع کر دی ہے۔

حکام کا کہنا ہے کہ حتمی فیصلہ تمام معاشی پہلوؤں کا جائزہ لینے کے بعد وزیراعظم کی منظوری سے کیا جائے گا۔ خطے میں کشیدگی کم ہونے سے عالمی توانائی منڈیوں میں استحکام آ رہا ہے جس کے باعث قیمتوں میں کمی کی راہ ہموار ہوئی ہے۔