کراچی: میٹرک کا کمپیوٹر سائنس کا پرچہ امتحان شروع ہوتے ہی آؤٹ

کراچی میں میٹرک کے امتحانات کا آغاز بدانتظامی اور پرچہ لیک ہونے کی اطلاعات کے ساتھ ہوا ہے۔ نویں اور دسویں جماعت کے امتحانات کے پہلے ہی روز کمپیوٹر سائنس کا پرچہ امتحان شروع ہونے سے قبل ہی آؤٹ ہو گیا جس نے امتحانی نظام کی شفافیت پر سنگین سوالات اٹھا دیے ہیں۔

بورڈ انتظامیہ کی جانب سے سہولیات کی فراہمی کے بلند و بانگ دعوے عملی طور پر بے اثر ثابت ہوئے ہیں۔ شدید گرمی کے موسم میں طلبہ بنیادی سہولیات سے محروم رہے اور انہیں سخت حبس کے عالم میں پرچے حل کرنے پڑے۔

گورنمنٹ بوائز سیکنڈری اسکول ملیر میں صورتحال انتہائی تشویشناک رہی جہاں کلاس رومز میں پنکھوں کا انتظام نہ ہونے کے باعث امیدوار شدید گرمی میں امتحان دینے پر مجبور ہوئے۔

امتحانی مراکز میں سہولیات کے فقدان اور پرچہ لیک ہونے کے واقعات نے انتظامیہ کی تیاریوں اور شفافیت پر سوالیہ نشان لگا دیا ہے۔ طلبہ اور والدین کی جانب سے امتحانی عمل میں بدانتظامی پر شدید تنقید کی جا رہی ہے۔