چمن بارڈر کے راستے افغان مہاجرین کی رضاکارانہ وطن واپسی کا سلسلہ جاری

کوئٹہ سے افغان مہاجرین کی اپنے وطن واپسی کا عمل جاری ہے اور روزانہ کی بنیاد پر سینکڑوں افراد چمن بارڈر کے راستے اپنے آبائی وطن روانہ ہو رہے ہیں۔

نادرا ذرائع کے مطابق چمن ہولڈنگ کیمپ میں روزانہ پانچ سو سے چھ سو افراد پہنچ رہے ہیں جہاں ان کی رجسٹریشن کا عمل مکمل کیا جاتا ہے۔

انتظامیہ کا کہنا ہے کہ کیمپ میں مہاجرین کی سہولت کے لیے عارضی رہائش گاہیں قائم کی گئی ہیں۔ اب تک مجموعی طور پر اکیس لاکھ اڑسٹھ ہزار سے زائد افغان مہاجرین اپنے وطن واپس جا چکے ہیں۔

اس موقع پر وطن واپس جانے والے افغان مہاجرین نے پاکستان کی جانب سے دہائیوں تک فراہم کی گئی میزبانی پر گہرے تشکر کا اظہار کیا۔ مہاجرین کا کہنا تھا کہ پاکستان نے ایک بہترین میزبان کا کردار ادا کیا ہے۔

انہوں نے مزید کہا کہ قیام کے دوران انہیں پاکستانی عوام اور حکومت کی جانب سے بھرپور تعاون حاصل رہا اور انہیں کبھی کسی قسم کی شکایت نہیں ہوئی۔ مہاجرین نے تسلیم کیا کہ پاکستان نے لاکھوں افغان باشندوں کو پناہ دے کر اعلیٰ انسانی اقدار کی پاسداری کی ہے۔