بھارت پاکستان کی علاقائی امن کے لیے کوششوں کا اعتراف کرے، احسن اقبال

وفاقی وزیر برائے منصوبہ بندی و ترقی احسن اقبال نے کہا ہے کہ بھارت کو پاکستان سے حسد کرنے کے بجائے خطے میں امن کے لیے کی جانے والی کوششوں پر شکر گزار ہونا چاہیے۔ نارووال میں ایک تقریب سے خطاب کرتے ہوئے انہوں نے کہا کہ پاکستان نے ایران اور امریکا کے درمیان جنگ بندی کروا کر دنیا کو تباہی سے بچایا ہے جس پر پوری دنیا کی نظریں پاکستان پر مرکوز ہیں۔

احسن اقبال نے کہا کہ امریکا اور اسرائیل کی ایران کے ساتھ کشیدگی نے پورے خطے کو تباہی کے دہانے پر لا کھڑا کیا تھا جس کے نتیجے میں عالمی معیشت متاثر ہوئی اور پاکستان سمیت دنیا بھر میں مہنگائی اور غربت میں اضافہ ہوا۔ انہوں نے مزید کہا کہ اللہ تعالیٰ نے پاکستان کو اس جنگ کے خاتمے کا ذریعہ بنا کر عزت بخشی ہے اور اس وقت امریکا اور ایران کے وفود امن مذاکرات کے لیے اسلام آباد میں موجود ہیں۔

وفاقی وزیر نے بتایا کہ وزیراعظم شہباز شریف نے آرمی چیف جنرل عاصم منیر کو کامیاب کوششوں پر مبارکباد دی ہے جس سے پاکستان کا وقار بلند ہوا ہے۔ انہوں نے کہا کہ اگر ہمارے پڑوسی سرحدوں سے دیکھیں تو انہیں ہر طرف دھواں ہی نظر آئے گا، اگر یہ جنگ نہ رکتی تو بھارت کے لاکھوں لوگ بھی بھوک، غربت اور بے روزگاری کا شکار ہو جاتے۔

احسن اقبال کا کہنا تھا کہ پاکستان نے نہ صرف دنیا کو بلکہ بھارت کو بھی تباہی سے بچایا ہے۔ انہوں نے زور دیا کہ بھارت کو پاکستان کی کامیابیوں پر جلنے کے بجائے شکر گزار ہونا چاہیے کیونکہ موجودہ حکومت کے دور میں اللہ تعالیٰ پاکستان کو مسلسل عزت اور کامیابیوں سے نواز رہا ہے۔