جمعیت علمائے اسلام کا پیٹرولیم مصنوعات کی قیمتوں میں مزید کمی کا مطالبہ

جمعیت علمائے اسلام ف کے ترجمان اسلم غوری نے پیٹرولیم مصنوعات کی قیمتوں میں حالیہ کمی کو ناکافی قرار دیتے ہوئے اسے عوام کے زخموں پر نمک پاشی کے مترادف قرار دیا ہے۔ انہوں نے حکومت سے مطالبہ کیا کہ معاشی فیصلوں میں عوامی مفاد کو اولین ترجیح دی جائے۔

ہفتے کے روز جاری کردہ اپنے بیان میں اسلم غوری نے کہا کہ جب حکمرانوں کی سوچ تاجروں والی ہو تو ایسے ہی فیصلے سامنے آتے ہیں۔ انہوں نے حکومت پر تنقید کرتے ہوئے کہا کہ قیمتیں بڑھاتے وقت عالمی منڈی کا حوالہ دیا جاتا ہے مگر کمی کرتے وقت آئی ایم ایف کی مجبوریوں کا ڈھنڈورا پیٹا جاتا ہے، جو کسی صورت قابل قبول نہیں۔

یاد رہے کہ خلیجی خطے میں کشیدگی اور آبنائے ہرمز کی بندش کے دوران حکومت نے ایندھن کی قیمتوں میں بھاری اضافہ کیا تھا۔ تاہم جنگ بندی کے اعلان کے بعد وزیراعظم شہباز شریف نے جمعہ کو ہائی اسپیڈ ڈیزل کی قیمت میں 135 روپے فی لیٹر کمی کا اعلان کیا، جبکہ نجی گاڑیوں میں استعمال ہونے والے پیٹرول کی قیمت میں محض 12 روپے فی لیٹر کی کمی کی گئی۔

اسلم غوری نے مزید بتایا کہ جے یو آئی ف آج اتوار کے روز مردان میں ایک بڑے عوامی اجتماع کا انعقاد کرے گی۔ ترجمان کے مطابق اس جلسے میں لاکھوں افراد کی شرکت متوقع ہے جو حکومتی پالیسیوں کے خلاف اپنے جذبات کا اظہار کریں گے۔

انہوں نے واضح کیا کہ مردان میں منعقدہ اس جلسہ عام سے جے یو آئی ف کے سربراہ مولانا فضل الرحمان سمیت پارٹی کی مرکزی اور صوبائی قیادت خطاب کرے گی۔