لیاری کو پیرس بنانے کا وعدہ 18 سال سے تشنہ تکمیل ہے، منعم ظفر

امیر جماعت اسلامی کراچی منعم ظفر نے کہا ہے کہ لیاری کو پیرس بنانے کے دعوے گزشتہ اٹھارہ برسوں سے کیے جا رہے ہیں مگر ان پر عملدرآمد تاحال ایک خواب ہی ہے۔

کراچی کے علاقے لیاری ایٹ چوک پر میڈیا سے گفتگو کرتے ہوئے منعم ظفر نے کہا کہ ناصر حسین شاہ نے لیاری ٹرانسمیشن پروجیکٹ کا اعلان کیا تھا اور سڑکوں کی تعمیر نو، نکاسی آب کے نظام کی بہتری اور پینے کے صاف پانی کی فراہمی کے وعدے کیے گئے تھے۔ تاہم پیپلز پارٹی کی جانب سے یہ وعدے گزشتہ اٹھارہ برسوں سے دہرائے جا رہے ہیں جن کا عملی نتیجہ صفر ہے۔

انہوں نے الزام عائد کیا کہ لیاری کے لیے لایا جانے والا ہر نیا ترقیاتی پیکیج کرپشن کا ذریعہ بن جاتا ہے۔ ان کا کہنا تھا کہ لیاری ٹاؤن پر پیپلز پارٹی کا مکمل کنٹرول ہے اور گزشتہ دو برسوں کے دوران علاقے کی تیرہ یونین کونسلوں کو فی یونین کونسل دو کروڑ روپے کے حساب سے مجموعی طور پر باون کروڑ روپے جاری کیے گئے۔

منعم ظفر نے سوال اٹھایا کہ گزشتہ تین برسوں میں ٹاؤن انتظامیہ یا وزیر بلدیات نے لیاری میں کون سا نمایاں کام کیا ہے، عوام کو بار بار دھوکہ دیا گیا ہے۔ انہوں نے کہا کہ لیاری ترقیاتی اعتبار سے اب بھی انتہائی پسماندہ ہے، جس کے پیش نظر اب جماعت اسلامی حق دو لیاری کی عوام کو مہم کا آغاز کر رہی ہے تاکہ شہریوں کے بنیادی حقوق کا حصول ممکن بنایا جا سکے۔