وزیرِ اعظم شہباز شریف انطالیہ فورم میں شرکت کے لیے ترکیہ پہنچ گئے

وزیر اعظم شہباز شریف سعودی عرب اور قطر کے کامیاب دوروں کے بعد اپنے تین ملکی دورے کے تیسرے مرحلے میں ترکیہ کے شہر انطالیہ پہنچ گئے ہیں۔ ان کے ہمراہ وفاقی وزیر خارجہ اسحاق ڈار، وزیر اطلاعات عطاء اللہ تارڑ، معاون خصوصی طارق فاطمی اور بین الاقوامی میڈیا کے ترجمان مشرف زیدی بھی موجود ہیں۔

انطالیہ ایئرپورٹ پر گورنر انطالیہ خلوصی شاہین، ترکیہ میں تعینات پاکستانی سفیر یوسف جنید اور دیگر اعلیٰ حکام نے وزیر اعظم کا استقبال کیا۔

وزیر اعظم شہباز شریف جمعہ کے روز پانچویں انطالیہ ڈپلومیسی فورم میں شرکت کریں گے۔ اس موقع پر وہ لیڈرز پینل سے خطاب کرتے ہوئے اہم عالمی اور علاقائی امور پر پاکستان کا نقطہ نظر پیش کریں گے۔ دورے کے دوران وزیر اعظم کی ترکیہ کے صدر رجب طیب اردوان اور دیگر عالمی رہنماؤں کے ساتھ دو طرفہ ملاقاتیں بھی متوقع ہیں۔

دفتر خارجہ کے مطابق وزیر اعظم 15 سے 18 اپریل تک سعودی عرب، قطر اور ترکیہ کے سرکاری دورے پر ہیں۔ انطالیہ روانگی سے قبل وزیر اعظم نے دوحہ میں قطر کے امیر شیخ تمیم بن حمد بن خلیفہ الثانی سے ملاقات کی۔

سماجی رابطے کی ویب سائٹ پر اپنے بیان میں وزیر اعظم نے کہا کہ امیر قطر کے ساتھ ملاقات انتہائی خوشگوار رہی جس میں خطے کی بدلتی ہوئی صورتحال پر تبادلہ خیال کیا گیا۔ انہوں نے خطے میں کشیدگی کم کرنے، مذاکرات اور امن و استحکام کے لیے عالمی سطح پر قریبی رابطوں کی اہمیت پر زور دیا۔

وزیر اعظم نے قطر اور دیگر علاقائی ممالک پر حملوں کی شدید مذمت کرتے ہوئے برادر ملک قطر کے عوام کے ساتھ مکمل یکجہتی کا اعادہ کیا۔