لاہور: ورثے کی بحالی کے 20 منصوبے فنڈز کی کمی اور تاخیر کا شکار

لاہور اتھارٹی فار ہیریٹیج ریوائیول کے زیر اہتمام شروع کیے گئے تاریخی ورثے کی بحالی کے بائیس منصوبے فنڈز کی کمی اور سست روی کا شکار ہیں۔ دستاویزات کے مطابق بائیس میں سے صرف دو منصوبوں کو مکمل فنڈز جاری کیے گئے ہیں۔ نیلا گنبد اور موچی گیٹ کے منصوبے مکمل فنڈنگ حاصل کرنے میں کامیاب رہے جبکہ دیگر بیس منصوبے مالی مشکلات اور تاخیر کی زد میں ہیں۔

انارکلی، تاریخی ٹریل اور مال روڈ پر بحالی کا کام انتہائی سست روی کا شکار ہے جہاں فنڈز کی فراہمی کے باوجود ان کا استعمال نہ ہونے کے برابر ہے۔ دہلی گیٹ سے اکبری گیٹ تک مصالحہ مارکیٹ کی بحالی کا کام ایک ارب روپے سے زائد کی لاگت سے جاری ہے لیکن اس کی رفتار تسلی بخش نہیں ہے۔ اسی طرح شاہدرہ کمپلیکس کی بحالی کا پہلا مرحلہ بھی فنڈز کی دستیابی کے باوجود زور نہیں پکڑ سکا۔

لاہور قلعہ اور قدیم فصیل کی بحالی کے کاموں میں بھی بھاری فنڈز کے باوجود پیش رفت محدود ہے۔ شالیمار باغ کی بحالی کا منصوبہ بھی تاخیر کا شکار ہے۔ انارکلی، جین مندر، پان گلی اور بخشش مارکیٹ کے لیے مختص فنڈز کا بڑا حصہ تاحال استعمال نہیں ہو سکا جس کے باعث وہاں کام تقریباً بند پڑا ہے۔ پانی والا تالاب اور ٹولنٹن مارکیٹ کے قریب زیر زمین پارکنگ کے منصوبے بھی سست روی سے جاری ہیں۔

دوسری جانب نیلا گنبد کے علاقے میں ترقیاتی کام اور زیر زمین پلازہ کی تعمیر نسبتاً تیز ہے۔ شہر کے اہم بنیادی ڈھانچے بشمول بجلی اور ٹیلی کام کے نظام کو زیر زمین منتقل کرنے، سیوریج، نکاسی آب، پانی کی فراہمی اور سڑکوں کی بہتری کے منصوبے یا تو سست روی کا شکار ہیں یا پھر بجٹ مختص ہونے کے باوجود ان پر کام کا آغاز نہیں ہو سکا۔

سیاحت کے فروغ کے لیے تاریخی عمارتوں اور حویلیوں کی بحالی کے منصوبوں کو تاحال فنڈز نہیں مل سکے۔ پاک ٹی ہاؤس اور قریبی تاریخی مقامات کے گرد بحالی کا کام بھی فنڈز کی عدم فراہمی کے باعث رکا ہوا ہے۔

حکام کا کہنا ہے کہ بحالی کے منصوبے تکنیکی اعتبار سے پیچیدہ ہیں جس کی وجہ سے کام کی رفتار سست دکھائی دیتی ہے۔ انہوں نے فنڈز کی فراہمی میں کسی بھی بڑے مسئلے کو مسترد کرتے ہوئے یقین دلایا کہ تمام منصوبے مقررہ اہداف کے مطابق مکمل کیے جائیں گے۔ شکیل احمد میاں سمیت دیگر حکام نے منصوبوں کو طے شدہ ٹائم لائن کے اندر مکمل کرنے کے عزم کا اعادہ کیا ہے۔