ملک بھر میں ماہ ذی القعدہ کا چاند نظر آ گیا، مرکزی رویت ہلال کمیٹی کا اعلان

مرکزی رویت ہلال کمیٹی کے چیئرمین مولانا عبدالخبیر آزاد نے ملک کے مختلف حصوں سے شہادتیں موصول ہونے کے بعد ماہ ذی القعد کا چاند نظر آنے کا باضابطہ اعلان کر دیا ہے۔ اس اعلان کے ساتھ ہی یکم ذی القعد کا آغاز آج بروز اتوار سے ہو رہا ہے۔

سپارکو کے اعداد و شمار کے مطابق نیا چاند 17 اپریل کو شام 4 بج کر 52 منٹ پر پیدا ہوا تھا اور 18 اپریل کی شام اس کی رویت کے قوی امکانات موجود تھے۔

میڈیا سے گفتگو کرتے ہوئے مولانا عبدالخبیر آزاد نے بتایا کہ ملک کے کچھ حصوں میں موسم صاف رہا جبکہ دیگر علاقوں میں مطلع ابر آلود تھا تاہم مختلف مقامات سے چاند دیکھے جانے کی شہادتیں موصول ہوئیں۔

چیئرمین رویت ہلال کمیٹی نے اس موقع پر خصوصی دعا کی کہ اللہ تعالیٰ پاکستان کو اندرونی اور بیرونی خطرات سے محفوظ رکھے۔ انہوں نے خطے میں امن و امان کے قیام کے لیے آرمی چیف جنرل عاصم منیر اور وزیراعظم شہباز شریف کی کوششوں کو سراہتے ہوئے کہا کہ ملکی قیادت نے پاکستان کا سر فخر سے بلند کیا ہے۔