آبنائے ہرمز میں بھارتی آئل ٹینکرز پر حملہ، نئی دہلی کا ایرانی سفیر کو طلب کر کے شدید احتجاج

بھارت نے آبنائے ہرمز میں اپنے پرچم بردار دو خام تیل کے ٹینکرز پر ہونے والے حملے پر شدید تشویش کا اظہار کرتے ہوئے تہران کے سفیر کو طلب کر لیا ہے۔ بھارتی وزارت خارجہ کے مطابق یہ واقعہ ہفتے کے روز پیش آیا جب یہ بحری جہاز آبنائے ہرمز سے گزرنے کی کوشش کر رہے تھے۔

بھارتی حکومتی ذرائع نے تصدیق کی ہے کہ حملے کا نشانہ بننے والے جہازوں میں سے ایک کا نام سنمار ہیرالڈ ہے۔ حکام کے مطابق خوش قسمتی سے جہاز پر موجود عملہ محفوظ ہے اور جہاز کو بھی کوئی بڑا نقصان نہیں پہنچا۔

بھارتی سیکریٹری خارجہ وکرم مصری نے نئی دہلی میں تعینات ایرانی سفیر محمد فتح علی کو طلب کر کے واقعے پر سخت احتجاج ریکارڈ کرایا۔ ملاقات کے دوران بھارت نے اس فائرنگ کے واقعے پر اپنی گہری تشویش سے آگاہ کیا۔

بھارتی وزارت خارجہ کے بیان کے مطابق سیکریٹری خارجہ نے ایرانی سفیر پر زور دیا کہ وہ نئی دہلی کے تحفظات سے اپنی حکومت کو فوری طور پر آگاہ کریں۔ بھارت نے مطالبہ کیا ہے کہ آبنائے ہرمز سے گزرنے والے بھارتی جہازوں کی محفوظ نقل و حمل کو جلد از جلد یقینی بنایا جائے۔

جواب میں ایرانی سفیر نے بھارتی قیادت کو یقین دلایا ہے کہ وہ ان تحفظات کو تہران میں متعلقہ حکام تک پہنچائیں گے تاکہ اس مسئلے کا مناسب حل نکالا جا سکے۔