اسلام آباد میں دکانیں اور بس اڈے بند کرنے کی خبریں بے بنیاد قرار، ڈپٹی کمشنر کی تردید

اسلام آباد کی ضلعی انتظامیہ نے وفاقی دارالحکومت میں دکانوں اور بس اڈوں کی بندش سے متعلق سوشل میڈیا پر گردش کرنے والی خبروں کو بے بنیاد قرار دے کر مسترد کر دیا ہے۔

انتظامیہ کی جانب سے جاری کردہ بیان میں واضح کیا گیا ہے کہ شہر میں کاروبار یا ٹرانسپورٹ سروسز بند کرنے کے حوالے سے کوئی احکامات جاری نہیں کیے گئے۔ حکام نے شہریوں پر زور دیا ہے کہ وہ ایسی غیر مصدقہ اطلاعات پر کان نہ دھریں اور افواہوں کو نظر انداز کریں۔

اس تردید سے قبل سوشل میڈیا اور مختلف حلقوں میں یہ خبر تیزی سے پھیلی تھی کہ ایران اور امریکہ کے درمیان مذاکرات کے دوسرے دور کے پیش نظر سیکیورٹی خدشات کے باعث اسلام آباد میں تمام مارکیٹیں اور بس اسٹیشن بند کیے جا رہے ہیں۔

اسلام آباد انتظامیہ نے اپنی وضاحت میں دو ٹوک الفاظ میں کہا ہے کہ ضلعی حدود میں تمام کاروباری مراکز معمول کے مطابق کھلے رہیں گے۔