آبنائے ہرمز بحران: صدر ٹرمپ کا وائٹ ہاؤس میں ہنگامی اجلاس طلب

امریکی صدر ڈونلڈ ٹرمپ نے آبنائے ہرمز کے بحران اور ایران کے ساتھ جاری مذاکرات پر غور کرنے کے لیے وائٹ ہاؤس کے سچویشن روم میں ایک ہنگامی اجلاس طلب کیا ہے۔ امریکی حکام کے مطابق ایران کی جانب سے آبنائے کو دوبارہ بند کرنے کے اعلان اور جہازوں پر حملوں کے بعد صورتحال انتہائی کشیدہ ہو گئی ہے۔

جنگ بندی کی مدت ختم ہونے میں اب صرف تین دن باقی ہیں جبکہ فریقین کے درمیان اگلے مذاکرات کی تاریخ تاحال طے نہیں پا سکی ہے۔ ایک اعلیٰ امریکی عہدیدار نے خبردار کیا ہے کہ اگر جلد کوئی بڑی پیش رفت نہ ہوئی تو آنے والے دنوں میں جنگ دوبارہ شروع ہو سکتی ہے۔

وائٹ ہاؤس کے اس اجلاس میں نائب صدر وینس، سیکریٹری خارجہ مارکو روبیو، وزیر دفاع پیٹ ہیگسیتھ اور وزیر خزانہ اسکاٹ بیسنٹ سمیت دیگر اہم حکام شریک ہوئے۔ اجلاس میں چیف آف اسٹاف سوسی وائلز، ایلچی اسٹیو وٹکوف، سی آئی اے کے ڈائریکٹر جان ریٹلف اور جوائنٹ چیفس کے چیئرمین ڈین کین بھی موجود تھے۔ وائٹ ہاؤس نے اس معاملے پر تاحال کوئی تبصرہ نہیں کیا ہے۔

اوول آفس میں صحافیوں سے گفتگو کرتے ہوئے صدر ٹرمپ نے کہا کہ ایران نے آبنائے کو دوبارہ بند کرنے کی کوشش کر کے چالاکی دکھائی ہے اور امریکہ کو بلیک میل نہیں کیا جا سکتا۔ انہوں نے امید ظاہر کی کہ دن کے اختتام تک یہ واضح ہو جائے گا کہ فریقین کسی معاہدے پر پہنچ پائیں گے یا نہیں۔

یاد رہے کہ اٹھائیس فروری کو امریکہ اور اسرائیل نے ایران کے خلاف مشترکہ کارروائی کا آغاز کیا تھا جس کے جواب میں تہران نے اسرائیل اور خطے میں موجود امریکی اثاثوں کو نشانہ بنایا تھا۔ آٹھ اپریل کو پاکستان کی ثالثی میں ہونے والی دو ہفتوں کی جنگ بندی کے بعد سے لڑائی رکی ہوئی ہے۔ گزشتہ ہفتے واشنگٹن اور تہران کے درمیان پاکستان میں مذاکرات ہوئے تھے اور اب اسلام آباد میں ایک اور نشست کے لیے کوششیں جاری ہیں۔