پاک بحریہ کا مقامی ساختہ کروز میزائل ‘تیمور’ کا کامیاب تجربہ

پاکستان بحریہ نے مقامی سطح پر تیار کردہ فضا سے فضا میں مار کرنے والے کروز میزائل تیمور کا کامیاب تجربہ کیا ہے۔

پاک فوج کے شعبہ تعلقات عامہ آئی ایس پی آر کے مطابق جدید اینٹی شپ میزائل سسٹم کے لائیو فائرنگ کے کامیاب مظاہرے کے دوران میزائل نے اپنے ہدف کو انتہائی درستگی کے ساتھ نشانہ بنایا۔

آئی ایس پی آر کا کہنا ہے کہ میزائل نے اپنے مشن کو غیر معمولی مہارت سے مکمل کیا جس سے پاکستان بحریہ کی سمندری حدود میں دشمن کے اہداف کو طویل فاصلے سے تلاش کرنے اور انہیں تباہ کرنے کی صلاحیتوں کی تصدیق ہوئی ہے۔

پاکستان بحریہ کی جانب سے کیا گیا یہ تجربہ قومی دفاعی صلاحیتوں میں ایک اہم سنگ میل کی حیثیت رکھتا ہے جس سے مسلح افواج کی روایتی میدان میں کثیر جہتی اور مربوط جوابی کارروائی کی صلاحیت مزید مستحکم ہوئی ہے۔

ترجمان کے مطابق پاکستان بحریہ ملکی سمندری حدود کے تحفظ اور قومی مفادات کے دفاع کے لیے پرعزم ہے۔

اس اہم کامیابی پر صدر مملکت آصف علی زرداری، وزیراعظم شہباز شریف اور عسکری قیادت نے میزائل کی تیاری میں شامل سائنسدانوں اور انجینئرز کو مبارکباد پیش کی ہے۔