پاکستان کی بین الاقوامی کیپٹل مارکیٹ میں واپسی، سرمایہ کاروں کا اعتماد بحال ہوا: وزیر خزانہ

وزیر خزانہ محمد اورنگزیب نے کہا ہے کہ پاکستان نے چار سال کے طویل وقفے کے بعد پرائیویٹلی پلیسڈ یورو بانڈ کے ذریعے بین الاقوامی کیپٹل مارکیٹ میں دوبارہ واپسی کر لی ہے، جو سرمایہ کاروں کے بڑھتے ہوئے اعتماد کا مظہر ہے۔

یہ بات انہوں نے یورپی یونین کے سفیر ریمنڈس کاروبلس سے ملاقات کے دوران کہی، جنہوں نے وزارت خزانہ میں وزیر خزانہ سے ملاقات کی۔ اس موقع پر وزیر خزانہ نے ملکی معیشت کے استحکام اور عالمی منڈیوں میں دوبارہ رسائی پر روشنی ڈالی۔

وزیر خزانہ نے بتایا کہ پاکستان کے پرائیویٹلی پلیسڈ یورو بانڈ کو سرمایہ کاروں کی جانب سے غیر معمولی پذیرائی ملی۔ اس کامیابی کے بعد پاکستان نے اپنے تین سالہ یورو بانڈ کے اجرا کو 750 ملین ڈالر تک بڑھا دیا ہے، جس میں 250 ملین ڈالر کا اضافی حصہ شامل ہے۔

محمد اورنگزیب کا کہنا تھا کہ یہ پیش رفت ملکی معاشی بنیادوں کی بہتری اور عالمی مالیاتی نظام میں پاکستان کے انضمام کی جانب ایک اہم قدم ہے۔ حکومت مستقبل میں مزید بین الاقوامی بانڈز اور جدید مالیاتی ذرائع متعارف کرانے کے لیے کوشاں ہے تاکہ بیرونی وسائل کو مستحکم کیا جا سکے۔

ملاقات کے دوران یورپی یونین کے سفیر نے وزیر خزانہ کو 28 اپریل 2026 کو اسلام آباد میں منعقد ہونے والے اعلیٰ سطحی یورپی یونین پاکستان بزنس فورم میں شرکت کی دعوت دی، جسے وزیر خزانہ نے قبول کر لیا۔

وزیر خزانہ نے اس فورم کو پاکستان کے سرمایہ کاری کے ماحول کو اجاگر کرنے کے لیے ایک بہترین پلیٹ فارم قرار دیا۔ انہوں نے ملکی معیشت کو مستحکم کرنے، زرمبادلہ کے ذخائر بڑھانے اور اصلاحاتی عمل کو آگے بڑھانے کے حکومتی عزم کا اعادہ کیا۔

محمد اورنگزیب نے پاکستان اور یورپی یونین کے تجارتی تعلقات میں جی ایس پی پلس فریم ورک کی اہمیت پر زور دیتے ہوئے اسے دوطرفہ معاشی تعاون کا ایک اہم ستون قرار دیا۔ انہوں نے کہا کہ حکومت ملکی مسابقت کو بڑھانے اور سرمایہ کاری کے نئے مواقع پیدا کرنے پر توجہ مرکوز رکھے ہوئے ہے۔