سپریم کورٹ کا ڈیجیٹل انصاف کے نئے معیارات کے قیام کا اعلان

سپریم کورٹ آف پاکستان نے ڈیجیٹل انصاف کی فراہمی میں ایک نیا سنگ میل عبور کرتے ہوئے شفاف اور جدید ٹیکنالوجی سے لیس عدالتی نظام کے عزم کا اعادہ کیا ہے۔ عدالت عظمیٰ کی جانب سے جاری کردہ اعلامیے کے مطابق جدید ٹیکنالوجی کے بروقت استعمال سے ملک بھر میں عدالتی کارروائیاں بغیر کسی تعطل کے جاری رکھنا ممکن بنایا گیا ہے۔

اسلام آباد میں قائم بنچ نے ویڈیو لنک کے ذریعے کوئٹہ، کراچی اور حیدرآباد سے وکلاء کی پیشیاں یقینی بنائیں۔ چیف جسٹس آف پاکستان یحییٰ آفریدی نے اسلام آباد سے کارروائی میں حصہ لیا، جبکہ جسٹس عائشہ ملک نے لاہور سے ویڈیو لنک کے ذریعے بنچ میں شمولیت اختیار کی۔

عدالت نے واضح کیا کہ ہنگامی حالات میں بھی عدالتی امور بلا تعطل جاری رہے ہیں۔ روایتی کاغذی ریکارڈ کی جگہ مکمل ڈیجیٹل فائلنگ سسٹم نے لے لی ہے جس سے برانچ رجسٹریوں سے دستاویزات منگوانے کا عمل ختم ہو چکا ہے۔ کیس بار کوڈنگ، ای فائلنگ اور ای آفس کے نفاذ سے عدالتی احکامات کی فوری ترسیل کو یقینی بنایا گیا ہے۔

چیف جسٹس یحییٰ آفریدی نے غیر متوقع تعطیلات کے دوران بھی عدالتی کام جاری رکھنے کے لیے نئی سٹینڈرڈ آپریٹنگ پروسیجرز جاری کی ہیں۔ ان ایس او پیز کے تحت ہنگامی نوعیت کے دیوانی اور فوجداری مقدمات، بشمول خاندانی کیسز، ضمانت کی درخواستیں، 80 سال سے زائد عمر کے قیدیوں کے مقدمات اور مختصر قانونی سوالات والے کیسز کو ترجیح دی جائے گی۔

زیر التواء مقدمات کے بوجھ کو کم کرنے کے لیے عدالت نے فیصلہ کیا ہے کہ ہر فائنل کاز لسٹ میں کم از کم 40 فیصد مقدمات 2018 تک کے پرانے کیسز پر مشتمل ہوں گے۔ سندھ اور بلوچستان کے وکلاء کی سہولت کے لیے ان کے کیسز ہفتے کے آخر میں شیڈول کیے گئے ہیں تاکہ انہیں سفری مشکلات کا سامنا نہ کرنا پڑے۔

عدالت عظمیٰ نے شفافیت بڑھانے اور صوابدیدی تاخیر کو ختم کرنے کے لیے خودکار کیس فکسیشن سسٹم متعارف کرانے کا بھی اعلان کیا ہے۔ یہ الگورتھم پر مبنی سسٹم ہفتہ وار اور ماہانہ کاز لسٹوں کے ذریعے عدالتی کام کے بہاؤ کو بہتر اور پیش گوئی کے قابل بنائے گا۔