وزیراعظم شہباز شریف اور ایرانی صدر کی ٹیلی فونک گفتگو، علاقائی صورتحال پر تبادلہ خیال

اسلام آباد میں وزیراعظم ہاؤس کے مطابق وزیراعظم شہباز شریف اور ایرانی صدر مسعود پزشکیان کے درمیان ہفتے کے روز ٹیلی فونک رابطہ ہوا ہے۔ دونوں رہنماؤں کے مابین گفتگو تقریباً 50 منٹ تک جاری رہی جس میں علاقائی صورتحال اور خطے میں امن و استحکام کے لیے جاری کوششوں پر تفصیلی تبادلہ خیال کیا گیا۔

وزیراعظم شہباز شریف نے 11 اور 12 اپریل 2026 کو اسلام آباد میں ہونے والے مذاکرات میں ایرانی وفد کی شرکت کو سراہا۔ انہوں نے وزیر خارجہ عباس عراقچی کی قیادت میں آنے والے اعلیٰ سطح کے ایرانی وفد کے دورے کا خیرمقدم کیا اور اس بات کا ذکر کیا کہ ایرانی وفد کی وزیراعظم اور دیگر اہم شخصیات کے ساتھ تفصیلی ملاقاتیں انتہائی مفید رہیں۔

وزیراعظم نے ایرانی صدر کو اپنی حالیہ سفارتی مصروفیات سے آگاہ کرتے ہوئے بتایا کہ عالمی رہنماؤں کے ساتھ رابطوں سے خطے میں پائیدار امن کے لیے مذاکرات اور سفارتکاری کی حمایت میں اتفاق رائے پیدا کرنے میں مدد ملی ہے۔ انہوں نے اس ماہ کے اوائل میں آرمی چیف فیلڈ مارشل سید عاصم منیر کے دورہ تہران کے دوران ایرانی قیادت کے ساتھ ہونے والی تعمیری بات چیت کی بھی تعریف کی۔

وزیراعظم شہباز شریف نے ایرانی صدر کے ساتھ گفتگو کے دوران کہا کہ ان کی ایرانی صدر کے ساتھ ہونے والی ٹیلی فونک بات چیت انتہائی گرم جوش اور تعمیری رہی۔ انہوں نے ایران کے سپریم لیڈر آیت اللہ مجتبیٰ خامنہ ای کے لیے نیک خواہشات اور احترام کا اظہار کیا اور علاقائی امن کے لیے پاکستان کے پختہ عزم کا اعادہ کیا۔