پنجاب بھر میں دفعہ 144 کے نفاذ میں توسیع

پنجاب بھر میں سیکیورٹی خدشات کے پیش نظر دفعہ 144 کے نفاذ میں توسیع کر دی گئی ہے جس کے تحت کھلی فضا میں ڈرون اڑانے پر پابندی برقرار رہے گی۔

محکمہ داخلہ پنجاب کی جانب سے جاری کردہ اعلامیے کے مطابق ڈرون کے استعمال پر عائد پابندی میں مزید 30 روز کی توسیع کی گئی ہے۔ یہ پابندی اب 25 مئی تک صوبے بھر میں نافذ العمل رہے گی۔

حکومتی نوٹیفکیشن میں واضح کیا گیا ہے کہ ان ڈور تقریبات مثلاً ہالز اور مارکیز میں چھوٹے ڈرونز کے محدود استعمال کی اجازت ہوگی۔ تاہم ایسی تقریبات کے منتظمین ڈرون کے محفوظ استعمال کو یقینی بنانے کے ذمہ دار ہوں گے۔

اعلامیے کے مطابق انٹیلی جنس اور قانون نافذ کرنے والے اداروں کو اس پابندی سے استثنیٰ حاصل ہوگا۔

محکمہ داخلہ پنجاب کا کہنا ہے کہ عوامی تحفظ، امن و امان کا قیام اور املاک کی حفاظت حکومت کی اولین ترجیحات میں شامل ہیں۔