وائٹ ہاؤس ڈنر پر فائرنگ کا ملزم: شناخت استاد اور ویڈیو گیم ڈویلپر کے طور پر ہوئی

وائٹ ہاؤس کرسپانڈنٹس ڈنر کے مقام پر فائرنگ کے شبے میں گرفتار ملزم کی شناخت کول تھامس ایلن کے نام سے ہوئی ہے۔ سی این این کی رپورٹ کے مطابق اکتیس سالہ ملزم جنوبی کیلیفورنیا کے علاقے ٹورنس کا رہائشی ہے اور پیشے کے اعتبار سے استاد اور ویڈیو گیم ڈویلپر ہے۔

قانون نافذ کرنے والے اداروں کے ذرائع کے مطابق ملزم کو اس مقام کے قریب سے حراست میں لیا گیا جہاں ڈونلڈ ٹرمپ اور دیگر اعلیٰ حکام موجود تھے۔ لنکن ان پروفائل کے مطابق ملزم سی ٹو ایجوکیشن نامی ادارے میں پارٹ ٹائم انسٹرکٹر کے طور پر خدمات سرانجام دیتا رہا ہے اور اسے دسمبر دو ہزار چوبیس میں ٹیچر آف دی منتھ کا ایوارڈ بھی دیا گیا تھا۔

تعلیمی پس منظر کے حوالے سے سامنے آیا ہے کہ ایلن نے دو ہزار سترہ میں کیلیفورنیا انسٹی ٹیوٹ آف ٹیکنالوجی سے مکینیکل انجینئرنگ میں ڈگری حاصل کی، جبکہ دو ہزار پچیس میں کیلیفورنیا اسٹیٹ یونیورسٹی سے کمپیوٹر سائنس میں ماسٹرز کی ڈگری مکمل کی۔ کی ٹیک میں تعلیم کے دوران وہ وہیل چیئرز کے لیے ہنگامی بریکنگ سسٹم تیار کرنے پر مقامی میڈیا کی سرخیوں میں بھی رہ چکا ہے۔

فیڈرل الیکشن کمیشن کے ریکارڈ سے پتا چلتا ہے کہ ملزم نے دو ہزار چوبیس کی انتخابی مہم کے دوران کملا ہیرس کو پچیس ڈالر کا چندہ بھی دیا تھا۔ ملزم خود کو ایک آزاد ویڈیو گیم ڈویلپر بھی کہلواتا ہے، جس نے سٹیم پلیٹ فارم پر بورڈم نامی گیم جاری کی اور دو ہزار اٹھارہ میں اس نام کا ٹریڈ مارک بھی رجسٹر کروایا۔ اس کے علاوہ اس کی پروفائل کے مطابق وہ فرسٹ لاء کے نام سے ایک اور گیم پر بھی کام کر رہا تھا۔