وزیراعلیٰ پنجاب کا لاہور میں 50 ایکڑ پر محیط ‘فلم سٹی’ قائم کرنے کا اعلان

وزیراعلیٰ پنجاب مریم نواز نے لاہور میں 50 ایکڑ رقبے پر محیط پنجاب فلم سٹی کے قیام کا اعلان کیا ہے، جس کا مقصد ملکی میڈیا اور انٹرٹینمنٹ انڈسٹری کو جدید خطوط پر استوار کرنا ہے۔ یہ منصوبہ نواز شریف آئی ٹی سٹی کے اندر تعمیر کیا جائے گا اور اسے ملک کا پہلا مربوط میڈیا پروڈکشن حب قرار دیا گیا ہے۔

وزیراعلیٰ مریم نواز کا کہنا ہے کہ اس منصوبے سے فلم، ٹیلی ویژن، اینیمیشن اور ڈیجیٹل میڈیا پروڈکشن کو ایک ہی چھت تلے لایا جائے گا۔ اس سہولت کے قیام سے پاکستان کی غیر ملکی پوسٹ پروڈکشن اور ویژول ایفیکٹس پر انحصار کرنے کی ضرورت ختم ہو جائے گی۔

فلم سٹی میں جدید ترین اسٹوڈیوز، ساؤنڈ اسٹیجز، پوسٹ پروڈکشن لیبارٹریز اور شوٹنگ کی مکمل سہولیات فراہم کی جائیں گی۔ اس کے علاوہ بین الاقوامی تقریبات اور ایوارڈ شوز کے لیے کنونشن ہالز، میڈیا ٹریڈ ہب اور فلم و موسیقی کے خصوصی تعلیمی ادارے بھی اس منصوبے کا حصہ ہوں گے۔

حکومتی بیان کے مطابق اس منصوبے سے ہزاروں کی تعداد میں براہ راست اور بالواسطہ روزگار کے مواقع پیدا ہوں گے، جس سے تخلیقی معیشت کو فروغ ملے گا۔ یہ منصوبہ مرحلہ وار مکمل کیا جائے گا۔

نواز شریف آئی ٹی سٹی 853 ایکڑ رقبے پر محیط ہے جس کے لیے پنجاب حکومت نے 10 ارب روپے کی ابتدائی فنڈنگ مختص کی ہے۔ اس وسیع منصوبے میں آئی ٹی ڈسٹرکٹ، ایجوکیشن سٹی، کمرشل اور رہائشی زونز شامل ہیں۔ اس کے پہلے مرحلے میں سیلسٹیا ٹوئن ٹاور آئی ٹی بلڈنگ کی تعمیر ایک سال میں مکمل کی جائے گی، جبکہ پورے منصوبے کی تکمیل تین سال میں متوقع ہے۔

منصوبے کی ماسٹر پلاننگ نیسپاک اور بین الاقوامی کنسلٹنٹس کی معاونت سے کی جا رہی ہے۔ اس کے لیے زمین نالج پارک کمپنی سے سی بی ڈی پنجاب کو منتقل کی جائے گی۔

تقریباً 100 ارب روپے کی لاگت سے مکمل ہونے والے اس منصوبے کا ہدف دس لاکھ ملازمتیں پیدا کرنا ہے۔ سرمایہ کاری کو راغب کرنے کے لیے حکومت نے اس منصوبے پر 10 سالہ ٹیکس چھوٹ کا اعلان بھی کیا ہے، جبکہ اسے جوائنٹ وینچرز اور ریئل اسٹیٹ انویسٹمنٹ ٹرسٹ جیسے ماڈلز کے تحت چلایا جائے گا۔