صدر زرداری اور وزیراعظم شہباز شریف کی واشنگٹن میں فائرنگ کے واقعہ کی شدید مذمت

صدر آصف علی زرداری اور وزیراعظم شہباز شریف نے واشنگٹن میں وائٹ ہاؤس کرسپانڈنٹس ایسوسی ایشن کے عشائیے کے دوران پیش آنے والے فائرنگ کے واقعہ کی شدید الفاظ میں مذمت کی ہے۔ دونوں رہنماؤں نے امریکی صدر ڈونلڈ ٹرمپ، خاتون اول میلانیا ٹرمپ اور دیگر حکام کے محفوظ رہنے پر اطمینان کا اظہار کیا ہے۔

چین کے پانچ روزہ دورے پر موجود صدر آصف علی زرداری نے اپنے بیان میں اس واقعے کو دہشت گردی کی گھناؤنی شکل قرار دیا۔ انہوں نے کہا کہ اس واقعے کی جتنی بھی مذمت کی جائے کم ہے۔ صدر نے امریکی صدر اور خاتون اول کے محفوظ رہنے پر اللہ کا شکر ادا کیا ہے۔

وزیراعظم شہباز شریف نے بھی واقعے پر گہرے صدمے کا اظہار کیا ہے۔ انہوں نے سماجی رابطے کی ویب سائٹ ایکس پر اپنے پیغام میں لکھا کہ وائٹ ہاؤس کرسپانڈنٹس ایسوسی ایشن کے عشائیے میں فائرنگ کا واقعہ انتہائی تشویشناک اور صدمے کا باعث ہے۔

وزیراعظم نے تقریب میں موجود تمام افراد کے محفوظ رہنے پر اطمینان کا اظہار کرتے ہوئے کہا کہ ان کی دعائیں امریکی صدر اور واقعے سے متاثرہ دیگر افراد کے ساتھ ہیں۔ واضح رہے کہ تقریب میں امریکی صدر اور اعلیٰ حکام کی موجودگی کے دوران فائرنگ کے بعد تقریب کو اچانک روک دیا گیا تھا۔