پنجاب حکومت مزدوروں کی فلاح و بہبود کے لیے پرعزم ہے: مریم نواز

وزیراعلیٰ پنجاب مریم نواز شریف نے کہا ہے کہ پنجاب حکومت اپنے ہر مزدور کی صحت، فلاح و بہبود اور تحفظ کے لیے مکمل طور پر پرعزم ہے۔ عالمی یوم برائے تحفظ و صحتِ کار کے موقع پر اپنے پیغام میں انہوں نے فیکٹریوں، صنعتوں اور دفاتر میں کام کرنے والے ملازمین کی جسمانی اور ذہنی صحت کو کلیدی اہمیت قرار دیا۔

وزیراعلیٰ نے محکمہ لیبر اور متعلقہ اداروں کو ہدایت کی ہے کہ کام کی جگہوں پر حفاظتی قوانین کی خلاف ورزی کرنے والوں کے خلاف سخت کارروائی عمل میں لائی جائے۔ انہوں نے واضح کیا کہ تمام صنعتی و کاروباری یونٹس کے لیے ضروری ہے کہ وہ حفاظتی آلات کی فراہمی اور احتیاطی تدابیر کو یقینی بنائیں تاکہ ورکرز کو کسی بھی قسم کے نقصان سے محفوظ رکھا جا سکے۔

مریم نواز شریف نے زور دیا کہ پیشہ ورانہ خطرات سے بچاؤ کے لیے حفاظتی معیارات کا نفاذ ناگزیر ہے، کیونکہ ایک صحت مند اور محفوظ مزدور ہی مضبوط قوم کی تعمیر میں اپنا کردار ادا کر سکتا ہے۔ انہوں نے صنعتی مالکان پر زور دیا کہ وہ مزدوروں کی فلاح کو ترجیح دیں، کیونکہ پنجاب حکومت کام کی جگہوں پر تحفظ کا کلچر فروغ دینے کے لیے پرعزم ہے۔

ملازمین کے تحفظ کے لیے لیبر قوانین میں ترامیم لائی جا رہی ہیں۔ اس وقت تقریباً 14 لاکھ ورکرز راشن کارڈز کے ذریعے ماہانہ مالی امداد حاصل کر رہے ہیں، جبکہ رواں مالی سال کے دوران مزید 50 ہزار فیکٹری ورکرز کو بھی راشن کارڈز جاری کیے جائیں گے۔

وزیراعلیٰ نے کہا کہ افرادی قوت ملک کا قیمتی اثاثہ ہے اور ان کی صحت و سلامتی پر کوئی سمجھوتہ نہیں کیا جائے گا۔ انہوں نے خبردار کیا کہ ملازمین کی صحت سے غفلت برتنے والی کمپنیوں کے خلاف سخت سزائیں دی جائیں گی اور حادثات کی روک تھام کے لیے بین الاقوامی معیار کے حفاظتی ضوابط کا نفاذ یقینی بنایا جائے گا۔