وزیراعظم کا یورپی یونین کے ساتھ تجارتی اور سرمایہ کاری تعلقات کے فروغ کے عزم کا اعادہ

یورپی کمیشن کے ڈائریکٹوریٹ جنرل برائے بین الاقوامی شراکت داری کے ایشیا پیسیفک ڈائریکٹر پیٹرس اوسٹوبس کی قیادت میں وفد نے وزیراعظم شہباز شریف سے ملاقات کی۔ وفد میں یورپی انویسٹمنٹ بینک کی ثریا تریکی کے علاوہ ایڈیڈاس، اینڈرز اور آئیکیا جیسی بڑی کمپنیوں کے اعلیٰ حکام شامل تھے۔ اس موقع پر پاکستان میں یورپی یونین کے سفیر ریمونڈاس کاروبلس بھی موجود تھے۔

وزیراعظم شہباز شریف نے وفد کو یقین دلایا کہ پاکستان یورپی یونین کے ساتھ تجارت اور سرمایہ کاری کے فروغ کے لیے مسلسل اور سنجیدہ کوششیں کر رہا ہے۔ انہوں نے یورپی یونین کو پاکستان کا سب سے بڑا تجارتی شراکت دار اور برآمدات کی اہم ترین منزل قرار دیا۔

وزیراعظم کا کہنا تھا کہ حکومت علاقائی چیلنجز بالخصوص مشرق وسطیٰ کی کشیدگی کے باعث عالمی سطح پر تیل کی قیمتوں میں اتار چڑھاؤ کے باوجود معیشت کو مستحکم کرنے کے لیے پرعزم ہے۔ انہوں نے یورپی کونسل کے صدر انتونیو کوسٹا سے حالیہ ٹیلی فونک رابطوں کا حوالہ دیتے ہوئے کہا کہ ان بات چیت میں علاقائی سلامتی اور دوطرفہ تعلقات پر تبادلہ خیال کیا گیا۔

یورپی وفد اور کاروباری نمائندوں نے فورم کے انعقاد پر پاکستان کے تعاون کو سراہا۔ انہوں نے توانائی، مواصلات اور انفارمیشن ٹیکنالوجی کے شعبوں میں باہمی تعاون بڑھانے کے وسیع امکانات پر زور دیا۔ وفد نے بتایا کہ فورم کے دوران چھ سو سے زائد بزنس ٹو بزنس ملاقاتیں متوقع ہیں۔

ملاقات میں نائب وزیراعظم و وزیر خارجہ اسحاق ڈار، وزیر تجارت جام کمال خان اور کابینہ کے دیگر ارکان بھی شریک تھے۔ وزیراعظم نے یورپی یونین پاکستان بزنس فورم میں وفد کی شرکت کا خیرمقدم کرتے ہوئے امید ظاہر کی کہ اس سے دونوں جانب معاشی روابط مزید مستحکم ہوں گے۔