وزیراعظم شہباز شریف اور نیوزی لینڈ کے ہم منصب کا ٹیلی فونک رابطہ، علاقائی صورتحال پر تبادلہ خیال

وزیراعظم شہباز شریف اور نیوزی لینڈ کے وزیراعظم کرسٹوفر لکسن کے درمیان ٹیلی فونک رابطہ ہوا ہے جس میں دوطرفہ تعلقات اور خطے کی صورتحال پر تبادلہ خیال کیا گیا۔

گفتگو کے دوران دونوں رہنماؤں نے باہمی دلچسپی کے امور اور علاقائی استحکام پر اتفاق رائے کا اظہار کیا۔ وزیراعظم شہباز شریف نے مشرق وسطیٰ کی بدلتی ہوئی صورتحال پر پاکستان کے مؤقف اور خطے میں کشیدگی کم کرنے کے لیے کی جانے والی سفارتی کوششوں سے نیوزی لینڈ کے وزیراعظم کو آگاہ کیا۔

نیوزی لینڈ کے وزیراعظم نے پاکستان کی جانب سے قیام امن کے لیے کی جانے والی کوششوں اور واشنگٹن و تہران کے ساتھ رابطوں کو سراہا اور ان اقدامات کی کامیابی کے لیے نیک خواہشات کا اظہار کیا۔

وزیراعظم شہباز شریف نے اس موقع پر پاکستان کے عزم کا اعادہ کیا کہ ملک عالمی اور علاقائی سطح پر قیام امن اور مذاکرات کے فروغ کے لیے اپنا کردار ادا کرتا رہے گا۔ دونوں رہنماؤں نے پاک نیوزی لینڈ تعلقات کو مزید مستحکم کرنے پر اتفاق کیا اور نیوزی لینڈ میں مقیم پاکستانی کمیونٹی کے مثبت کردار کو سراہا۔

وزیراعظم شہباز شریف نے نیوزی لینڈ کے ہم منصب کو دورہ پاکستان کی دعوت دی جبکہ دونوں رہنماؤں نے مستقبل میں بھی قریبی رابطے برقرار رکھنے پر اتفاق کیا۔